Meflosid 750 mq

Beynəlxalq patentləşdirilməmiş adı:  Levofloxacin

Buraxılış : Reseptli

İxtisas : Antimikrob

Meflosid 750 mq Tərkibi 

Təsiredici maddə: 1 tabletin tərkibində 500 mq levofloksasin (512,46 mq levofloksasin hemihidrat şəklində) və ya 750 mq levofloksasin (768,69 mq levofloksasin hemihidrat şəklində) vardır

Köməkçi maddələr: mikrokristallik sellüloza (Avicel PH102), krospovidon, hidroksipropilmetilsellüloza, natrium stearilfumarat; Opadry II-85F18422 ağ (polivinil spirti, titan dioksid, polietilenqlikol, talk). 

Farmakoterapevtik qrupu

Antibakterial vasitə, flüorxinolon.

ATC kodu: J01MA12

Farmakoloji xüsusiyyətləri 

Meflosid 750 mq nə üçündür?

Farmakodinamikası

Levofloksasin flüorxinolon qrupuna aid peroral və venadaxili istifadə üçün geniş spektrli antibakterial vasitədir.

Levofloksasin flüorxinolon qrupundan antibakterial vasitə olub, bakteriyaların DNT-DNT-giraza kompleksinə (bakterial topoizomeraza II) və topoizomeraza IV-ə təsir edərək bakterisid təsir göstərir.

Mikrobiologiya

Levofloksasin qrammüsbət və qrammmənfi mikroorqanizmlərin geniş spektrinə qarşı dayanıqlıdır.

Levofloksasin inhibəedici konsentrasiyalara yaxın və ya bir qədər artıq konsentrasiyalarda adətən bakterisid təsir göstərir. 

In vitrolevofloksasinə qarşı spontan mutasiyalar nəticəsində yaranan rezistentlik çox nadirdir. Ancaq, levofloksasin və digər flüorxinolonlar arasında çarpaz rezistentlik mümkündür. 

İstər in vitro, istərsə də klinik tədqiqatlar zamanı levofloksasin aşağıdakı patogenlərə təsir göstərmişdir.

Aerob qrammüsbət mikroorqanizmlər: Enterococcus faecalis, Staphylococcus aureus (metisillinə həssas ştammlar), Staphylococcus epidermidis (metisillinə həssas ştammlar), Staphylococcus saprophyticus, Streptococcus pneumoniae (o cümlədən bir çox dərman vasitələrinə qarşı dayanıqlı ştammlar), Streptococcus pyogenes;  

Aerob qrammənfi: Enterobacter cloacae, Escherichia coli, Haemophilus influenzae, Haemophilus parainfluenzae, Klebsiella pneumoniae, Legionella pneumophila, Moraxella catarrhalis, Proteus mirabilis, Pseudomonas aeruginosa, Serratia marcescens; 

Digər mikroorqanizmlər: Chlamydia pneumoniae, Mycoplasma pneumoniae. 

Aşağıdakı mikroorqanizmlərə qarşı levofloksasinin effektivliyi in vitro olaraq nümayiş etdirilmişdir, lakin klinik tədqiqatlarda təyin olunmamışdır:

Aerob qrammüsbət: Staphylococcus haemolyticus, Streptococcus (C/F qrupu), Streptococcus (G qrupu), Streptococcus agalactiae, Streptococcus milleri, Viridansqrupundan streptokokklar;

Aerob qrammənfi: Acinetobacter baumannii, Acinetobacter lwoffii, Bordetella pertussis, Citrobacter (diversus) koseri, Citrobacter freundii, Enterobacter aerogenes, Enterobacter sakazaki, Klebsiella oxytoca, Morganella morganii, Pantoea (Enterobacter) agglomerans, Proteus vulgaris, Providencia rettgeri, Providencia stuartii, Pseudomonas flourescens; 

Anaerob qrammüsbət:Clostridium perfringens.

Farmakokinetikası

Levofloksasin daxilə qəbulundan sonra tez və tamamilə sorulur. Qan plazmasında maksimal konsentrasiyaya daxilə qəbulundan 1-2 saat sonra çatır. Mütləq biomənimsənilməsi təxminən 99% təşkil edir. Levofloksasinin farmakokinetikası tək və ya təkrarlanan peroral və ya venadaxili dozalar rejimində xətti və təxmin edilə biləndir. Sabit konsentrasiyaları gündə 500 mq və ya 750 mq dozalarda qəbulundan 48 saat sonra əldə olunur. Meflosid™örtüklü tabletləri qida qəbulundan 1 saat əvvəl və ya 2 saat sonra qəbul etmək tövsiyə edilir, belə ki, 500 mq-lıq dozada levofloksasinin qida ilə birgə qəbulu maksimal konsentrasiyaya çatma müddətini 1 saat uzadır və plazmada maksimal konsentrasiya tabletlərin qəbulundan sonra 14%, peroral məhlulun qəbulundan sonra 25% azalır. Levofloksasinin eyni dozalarda peroral və venadaxili yeridilməsi zamanı farmakokinetikası oxşar və müqayisə edilə bilən olduğundan bir dərman formasından digərinə keçid almaq mümkündür.

Levofloksasin plazma və sidikdə stereokimyəvi olaraq sabitdir və metabolik olaraq öz enantiomerinə dönmür. Peroral qəbulundan sonra yeridilən dozanın 87% 48 saat ərzində sidiklə dəyişilməmiş formada, dozanın 4% 72 saat ərzində nəcislə xaric edilir. Levofloksasin əhəmiyyətsiz dərəcədə metabolizmə uğrayır və əsasən sidiklə dəyişilməmiş şəkildə xaric edilir. Peroral və venadaxili yolla tək və təkrarlanan dozalarda yeridildikdən sonra levofloksasinin yarımxaricolma müddəti təxminən 6-8 saat civarındadır.   

İstifadəsinə göstərişlər

Meflosid örtüklü tabletlər böyüklərdə levofloksasinə həssas mikroorqanizmlərlə törədilmiş aşağıdakı infeksiyalarda göstərişdir:

• Kəskin haymorit
• Xronik bronxitin kəskinləşməsi
• Xəstəxanadankənar pnevmoniya
• Sidikçıxarıcı sistemin fəsadlaşmış infeksiyaları, o cümlədən pielonefrit
• Xronik bakterial prostatit
• Dəri və yumşaq toxumaların infeksiyaları.

Meflosid 750 mq Əks göstərişlər

Levofloksasinə və ya xinolon qrupundan digər antibakterial vasitələrə, həmçinin tərkibinə daxil olan köməkçi maddələrə qarşı yüksək həssaslıq.

Epilepsiya.

Əvvəllər flüorxinolon qrupundan antibakterial vasitənin istifadəsi ilə əlaqəli olan vətər zədələnməsi.

Uşaqlarda və yeniyetmələrdə istifadə.

Hamiləlik və laktasiya dövrü.

Xüsusi göstərişlər

P.aeruginosa ilə törədilmiş nozokomial infeksiyalarda digər antibiotiklər ilə kombinasiyası tələb oluna bilər.

• Müalicə müddəti və ya müalicədən sonra ağır davamlı və/və ya qanlı ishal müşahidə olunursa, Clostridium difficileilə əlaqəli psevdomembranoz enterokolit ehtimalı nəzərdə saxlanılmalıdır. Buna şübhə yarandıqda Meflosid™örtüklü tabletlərlə müalicə dərhal kəsilməli və yubanmadan müvafiq dəstəkləyici və/və ya spesifik müalicəyəbaşlanılmalıdır. Bu klinik vəziyyətdə bağırsaq peristaltikasını süstləşdirən preparatlar əks göstərişdir. 
• Flüorxinolon qrupundan antibakterial vasitələrin istifadəsi zamanı nadir hallarda tendinit, ayrı-ayrı hallarda – Axill vətərinin qırılması mümkündür. Bu xoşagəlməz təzahür müalicənin başlanğıcından 48 saat sonra yarana bilər və bilateral ola bilər. Tendinit və vətərin qırılma riski yaşlı xəstələrdə və kortikosteroidləri qəbul edənlərdə daha yüksəkdir. Buna görə də Meflosid™örtüklü tabletlərin istifadəsi zamanı belə xəstələri müşahidə etmək vacibdir. Tendinitə şübhə yarandıqda Meflosid örtüklü tablerlər ilə müalicə dərhal kəsilməli və müvafiq müalicəyə (yəni zədələnmiş vətərin immobilizasiyası) başlanılmalıdır. 
• Digər flüorxinolonlar kimi Meflosid™örtüklü tabletlər əvvəlki baş beyin zədələnməsi ilə əlaqəli qıcolmalara meylli xəstələrdə, fenbufen və ya ona oxşar qeyri-steroid iltihabəleyhinə vasitələr və ya teofillin kimi qıcolmaya hazırlığı azaldan dərman vasitələri ilə birgə ehtiyatla istifadə edilməlidir. 
• Qlükoza-6-fosfatdehidrogenaza çatışmazlığı olan xəstələrdə ehtiyatla istifadə edilməlidir, belə ki, bu qrup xəstələrdə xinolon qrupu antibakterial vasitələrin istifadəsi zamanı hemolitik reaksiyalar haqqında məlumat verilmişdir.  
• Böyrək çatışmazlığı zamanı Meflosid örtüklü tabletlərin dozası kreatinin klirensi nəzərə alınaraq tənzimlənir. 
• Levofloksasinin istifadəsi zamanı fotosensibilizasiya çox nadir hallarda müşahidə olunsa da, xəstələrə güclü günəş və ya solyarium kimi süni ultrabənövşəyi işıq tövsiyə edilmir. 
• Meflosid örtüklütabletlərlə müalicə zamanı müşahidə olunan bəzi əlavə təsirlər diqqətin cəmləşmə bacarığını və reaksiya bacarığını pisləşdirə bilər, bu da, xüsusən də nəqliyyat vasitələri və işçi texnikanın idarə olunması zamanı müəyyən risk təşkil edə bilər.  
• Digər xinolonların istifadəsi zamanı olduğu kimi eyni zamanda peroral hipoqlikemik vasitələr (qliburid/qlibenklamid) və ya insulin istifadə edən şəkərli diabeti olan xəstələrdə qanda qlükoza səviyyəsinin dəyişilməsi, o cümlədən simptomatik hiper- və ya hipoqlikemiya haqda məlumat verilmişdir. Bu xəstələrdə qanda qlükoza səviyyəsi diqqətlə izlənilməlidir. Meflosid ilə müalicəolunan xəstədə hipoqlikemik reaksiya yarandıqda dərhal müalicə kəsilməli və müvafiq müalicə aparılmalıdır. 
• Xinolonlarla, o cümlədən də levofloksasinlə müalicə zamanı ciddi və bəzən də ölümlə nəticələnən hiperhəssaslıq reaksiyaları və/və ya anafilaktik şok haqqında məlumat verilmişdir. Belə reaksiyalar tez-tez ilk doza yeridildikdən sonra meydana çıxır. Bəzi reaksiyalar ürək-damar kollapsı, hipotenziya/şok, qıcolmalar, huşun itirilməsi, dəridə yanma hissi, angionevrotik ödem, təngnəfəslik, övrə, qaşınma və digər ciddi dəri reaksiyaları ilə birgə müşahidə oluna bilər. İlk dəri səpgisi və ya digər hiperhəssaslıq simptomları meydana çıxdıqda dərhal levofloksasin ilə müalicə kəsilməlidir. Ciddi kəskin hiperhəssaslıq reaksiyaları zamanı epinefrin, həmçinin oksigen, venadaxili məhlullar, histamin əleyhinə vasitələr, kortikosteroidlər, pressor aminlər və digər reanimasiya tədbirlərinə, o cümlədən də tənəffüs yollarının keçiriciliyinin təmin olunmasına ehtiyac ola bilər. 
• Digər antibiotiklərlə müalicə zamanı olduğu kimi levofloksasinin, xüsusən də uzunmüddətli istifadəsi rezistent mikroorqanizmlərin artmasına səbəb ola bilər. Buna görə də təkrar müalicə zamanı xəstənin vəziyyəti nəzərə alınır. Müalicə zamanı superinfeksiya meydana çıxdıqda müvafiq tədbirlər görülməlidir. 
• Levofloksasin QT intervalının uzanma sindromuna və ya Torsades de Pointes-ə səbəb ola bilər. QT intervalının anadangəlmə uzanması və ya Torsades de Pointesdiaqnozu qoyulduqda yaxud ona şübhəolduqda istifadə olunmamalıdır. 

Digər dərman vasitələri ilə qarşılıqlı təsiri

Antasidlər, sukralfat, dəmir duzları, multivitamin preparatlar

Digər xinolonlarla müqayisədə ikivalentli kationlarla kompleksyaratma daha az olsa da, Meflosid™örtüklü tabletlərin dəmir duzları, sukralfat, tərkiblərində metal kationları (dəmir kimi) və sink saxlayan multivitamin preparatlar, tərkiblərində maqnezium və alüminium saxlayan antasidlərlə birgə istifadəsi levofloksasinin mədə-bağırsaq traktından sorulmasına mənfi təsir edə bilər və gözləniləndən daha aşağı konsentrasiyalarına səbəb ola bilər. Bu maddələri saxlayan preparatları Meflosid™örtüklü tabletlərinin qəbulundan 2 saat əvvəl və ya 2 saat sonra qəbul etmək tövsiyə edilir. 

Teofillin

Levofloksasinin teofillin ilə qarşılıqlı təsiri haqda məlumat verilməmişdir. Digər xinolonların teofillinlə birgə istifadəsi teofillinin plazma konsentrasiyasının azalmasına, yarımxaricolma müddətinin uzanmasına və bu qrup xəstələrdə əlavə təsir riskinin artmasına səbəb ola bilər. Teofillinin levofloksasinlə birgə istifadəsi zamanı teofillinin səviyyəsinə ciddi nəzarət etmək və dozanın müvafiq korreksiyasını aparmaq vacibdir. Teofillinin dozasının azalıb-azalmamasından asılı olmayaraq əlavə təsirlər mümkündür, o cümlədən də qıcolmalar. 

Varfarin

Aparılmış klinik tədqiqatlar zamanı levofloksasin və varfarin arasında qarşılıqlı təsir qeyd olunmamışdır. Lakin bazarlamadan sonrakı tədqiqatlar zamanı levofloksasinlə birgə istifadəsi zamanı varfarinin təsirinin güclənməsi haqda məlumat verilmişdir. Bu zaman qanaxma ilə yanaşı protrombin müddətinin də uzanması müşahidə olunmuşdur. Levofloksasin və varfarinin birgə istifadəsi zamanı protrombin müddətinin, beynəlxalq normallaşdırılmış nisbət (BNN) və digər müvafiq koaqulyasiya testlərinin ciddi monitorinqi vacibdir. Qanaxma ehtimalı olduğundan xəstələr nəzarət altında olmalıdırlar. 

Siklosporin

Levofloksasinin siklosporinlə birgə istifadəsi zamanı Cmaxvəke  bir qədər azalır, Tmaxvət ½göstəriciləri ayrı-ayrılıqda istifadələri ilə müqayisədə daha aşağıdır. Lakin fərq klinik olaraq əhəmiyyətsiz olduğundan istər siklosporin, istərsə də levofloksasinin dozasının korreksiyasına ehtiyac yoxdur.   

Diqoksin

Aparılmış tədqiqatlar zamanı levofloksasin və diqoksin arasında qarşılıqlı təsirlər müşahidə olunmamışdır. Bu səbəbdən levofloksasinin diqoksin ilə birgə istifadəsi zamanı istər levofloksasin, istərsə də diqoksinin dozasının korreksiyasına ehtiyac yoxdur.

Probenesid və simetidin

Aparılmış klinik tədqiqatlar zamanı levofloksasinin probenesid və simetidin ilə istifadəsi zamanı levofloksasinin təklikdə istifadəsi ilə müqayisədə sorulmanın sürət və miqdarı dəyişmədikdə AUC və T1/2göstəricilərinin 27-38% və 30% artması, CL/F və CL göstəricilərinin 21-35% azalması müşahidə olunmuşdur. Bu göstəricilər statistik əhəmiyyət kəsb etsə də probenesid və simetidinlə birgə istifadəsi zamanı levofloksasinin dozasının korreksiyası üçün kifayət deyil. 

QSİƏV

QSİƏV-lərin xinolonlarla, o cümlədən də levofloksasinlə birgə istifadəsi zamanı MSS stimulyasiyası və qıcolma riski arta bilər. 

Diabet əleyhinə vasitələr

Xinolonların diabet əleyhinə vasitələrlə birgə istifadəsi zamanı qanda qlükoza səviyyəsinin dəyişilməsi, o cümlədən də hiperqlikemiya və hipoqlikemiya halları mümkündür, buna görə də şəkərli diabet əleyhinə vasitələr və levofloksasin istifadə edən xəstələrə qanda qlükozanın səviyyəsinə ciddi nəzarət etmək tövsiyə edilir. 

Hamiləlik və laktasiya dövründə istifadəsi 

Hamiləlik 

Kifayət qədər tədqiqatlar mövcud olmadığından hamilə qadınlarda istifadə edilməməlidir.

Laktasiya

Adekvat və yaxşı nəzarət olunan tədqiqatlar mövcud olmadığından laktasiya dövründə istifadə edilməməlidir. 

Nəqliyyat vasitələrini vədigər potensial təhlükəlimexanizmləri idarəetmə qabiliyyətinə təsiri

Levofloksasin ilə müalicə zamanı müşahidə olunan bəzi əlavə təsirlər diqqəti toplamabacarığını və reaksiya bacarığını pisləşdirə bilər, bu da, xüsusən də nəqliyyat vasitələri və işçi texnikanın idarə edilməsi kimi vəziyyətlərdə müəyyən risk təşkil edə bilər. 

Meflosid 750 mq İstifadə qaydası və dozası 

Meflosid örtüklü tabletlər gündə 1 və ya 2 dəfə qəbul edilir. Doza infeksiyanın növündən, ağırlığından və ehtimal olunan patogenin həssaslığındanasılı olaraq korreksiya olunur. 

Müalicə müddəti xəstəliyin gedişindən asılıdır. Meflosid™örtüklü tabletlər daxilə çeynəmədən, kifayət qədər maye ilə qəbul edilir. Dozanın korreksiyasına ehtiyac olduqda tabletlərin bölünməsinə yol verilir. Tabletlər qida qəbulundan 1 saat əvvəl və ya 2 saat sonra qəbul edilə bilər.Meflosid™örtüklü tabletlərin sorulmasının azalmasının qarşısını almaq üçün tabletlər dəmir duzları, antasid və ya sukralfatın qəbulundan 2 saat əvvəl və ya 2 saat sonra qəbul edilməlidirlər. 

Normal böyrək funksiyası olan xəstələrdə dozalanma rejimi (kreatinin klirens >50 ml/dəq)

Əlavə təsirləri

Əlavə təsirlərinrastgəlmə tezliyi:çox tex-tez (≥1/10); tez-tez ( ≥1/100-dən <1/10-dək); bəzən (≥1/1000-dən <1/100-dək); nadir hallarda(≥1/10000-dən <1/1000-dək); çox nadir hallarda(<1/10000); rast gəlmə tezliyi məlum deyil(əldə olan göstəricilərə görə təyin edilə bilmir).

• İnfeksiyalar və invaziyalar
• Bəzən: göbələk infeksiyaları (və digər rezistent mikroorqanizmlərin proliferasiyası).
• Qan və limfatik sistemə
• Bəzən: leykopeniya, eozinofiliya;
• Nadir hallarda:neytropeniya, trombositopeniya;
• Çox nadir hallarda: aqranulositoz;
• Rast gəlmə tezliyi məlum deyil:pansitopeniya, hemolitik anemiya.
• İmmun sistemə
• Çox nadir hallarda: anafilaktik şok.
• Anafilaktik və anafilaktoid reaksiyalar bəzən ilk doza yeridildikdən sonra yarana bilər.
• Rast gəlmə tezliyi məlum deyil:hiperhəssaslıq reaksiyaları.
• Maddələr mübadiləsinə və qidalanmaya
• Bəzən: anoreksiya;
• Çox nadir hallarda: hipoqlikemiya, xüsusən də şəkərli diabeti olanlarda.
• Psixi pozulmalar
• Bəzən: yuxusuzluq, əsəbilik;
• Nadir hallarda: psixotik pozulmalar, depressiya, şüurun dolaşıqlığı, oyanıqlıq, həyəcanlılıq;
• Çox nadir hallarda:suisidaldavranışlı psixotikreaksiyalar, intihar fikirlər və ya hərəkətlər daxil olmaqla, hallüsinasiyalar.
• Sinir sisteminə
• Bəzən: başgicəllənmə, yuxusuzluq, yuxululuq;
• Nadir hallarda: paresteziyalar, tremor, qıcolmalar;
• Çox nadir hallarda: sensor və sensomotor periferik neyropatiyalar, dadbilmə və iybilmənin pozulması. 
• Görməyə
• Çox nadir hallarda: görmənin pozulması.
• Eşitmə orqanına və labirint sisteminə
• Bəzən:baçgicəllənmə;
• Çox nadir hallarda: eşitmə pozulmaları;
• Rast gəlmə tezliyi məlum deyil:qulaqda küy.
• Ürək-damar sisteminə
• Nadirhallarda: taxikardiya, hipotenziya;
• Rast gəlmə tezliyi məlum deyil:EKQ-da QT intervalının uzanması. 
• Tənəffüs, döş qəfəsi orqanları və divararası orqanlara
• Nadirhallarda: bronxospazm, təngnəfəslik;
• Çox nadir hallarda: allergik pnevmonit.
• Mədə-bağırsaq sisteminə
• Tez-tez:diareya, ürəkbulanma;
• Bəzən:qusma, qarında ağrı, dispepsiya, meteorizm, qəbizlik;
• Nadirhallarda: qanlı diareya, bu da enterokolit, o cümlədən də psevdomembranoz kolitin simptomu ola bilər.
• Hepatobiliar sistemə
• Tez-tez:qaraciyər fermentləri (ALT, AST, qələvi fosfataza, QQT) səviyyəsinin artması;
• Nadirhallarda: qan plazmasında bilirubin səviyyəsinin artması;
• Çox nadir hallarda: hepatit;
• Rast gəlmə tezliyi məlum deyil:sarılıq və qaraciyər funksiyasının ağır pozulması, kəskin qaraciyər çatışmazlığı daxil olmaqla.
• Dəri və dərialtı piytoxumasına 
• Bəzən:səpgi, qaşınma;
• Nadirhallarda: övrə;
• Çox nadir hallarda: angionevrotik ödem, fotosensibilizasiya reaksiyaları;
• Rast gəlmə tezliyi məlum deyil:toksik epidermal nekroliz, Stivens-Conson sindromu, multiform ekssudativ eritema, hiperhidroz. 
• Dəri və selikli qişalar tərəfindən reaksiyalar artıq ilk dozanın qəbulundan sonra yarana bilər. 
• Sümük-əzələ sisteminə, birləşdirici toxumaya
• Nadirhallarda: vətərlərin zədələnməsi, o cümlədən tendinit (məsələn, Axilles vətərinin),artralgiya, mialgiya;
• Çox nadir hallarda: vətərin qırılması müalicə başlandıqdan 48 saat ərzində yarana bilər və ikitərəfli ola bilər, əzələ zəifliyi (miasteniyalı xəstələr üçün xüsusi əhəmiyyət kəsb edə bilər);
• Rast gəlmə tezliyi məlum deyil:rabdomioliz.
• Böyrək və sidikçıxarıçı yolları
• Bəzən:qan plazmasında kreatinin səviyyəsinin artması.
• Çox nadir hallarda: kəskin böyrək çatışmazlığı (məsələn, interstisial nefrit ilə əlaqəli).
• Ümumi pozulmalar və yerli reaksiyalar
• Bəzən:asteniya;
• Çox nadir hallarda: hərarətin yüksəlməsi;
• Rast gəlmə tezliyi məlum deyil:ağrı (bel, sinə və ətraflarda olan ağrıları daxil olmaqla)
• Flüorxinolonların istifadəsi ilə əlaqəli digər arzuolunmayan təzahürlər:
• ekstrapiramid əlamətlər və əzələ koordinasiyasının digər pozulmaları;
• hiperhəssaslıq vaskuliti;
• porfiriyalı xəstələrdə porfiriya həmlələri.

Arzuolunmaz effektlər baş verdikdə həkimə müraciət edin.

Doza həddinin aşılması

Meflosid™örtüklü tabletlərin kəskin doza həddinin aşılması zamanı gözlənilən simptomlar mərkəzi sinir sistemi tərəfindən huşun dolaşıqlığı, başgicəllənmə, huşun pozulması və epitutmalar şəklində və mədə-bağırsaq sistemi tərəfindən ürəkbulanma və mədənin selikli qişasının eroziyası şəklində özünü büruzə verir. 

Levofloksasinin supra-terapevtik dozaları ilə keçirilən klinik-farmakoloji tədqiqatlar zamanı QT intervalının uzanması qeyd olunmuşdur. 

Doza həddinin aşılması zamanı xəstə ciddi nəzarət altında olmalıdır və simptomatik müalicə aparılmalıdır. Doza həddinin kəskin aşılması zamanı mədənin yuyulması haqqında düşünmək olar. Mədənin selikli qişasının qorunması üçün antasidlərin istifadəsi mümkündür. Levofloksasin hemodializ, peritoneal dializ və daimi ambulator peritoneal dializ vasitəsilə xaric edilmir. Xüsusi antidotu yoxdur. 

Buraxılış forması

Meflosid 500 mq örtüklü tabletlər. 7 tablet, blisterdə. 1 blisteriçlik vərəqə ilə birlikdə karton qutuya qablaşdırılır.   

Meflosid 750 mq örtüklü tabletlər. 7 tablet, blisterdə. 1 blisteriçlik vərəqə ilə birlikdə karton qutuya qablaşdırılır.   

Saxlanma şəraiti

25 °С-dən yüksək olmayan temperaturda, öz qutusunda, quru və uşaqların əli çatmayan yerdə saxlanılmalıdır.

Yararlılıq müddəti 

3 il. Yararlılıq müddəti bitdikdən sonra istifadə etmək olmaz.

Aptekdən buraxılma şərti

Resept əsasında buraxılır.

Meflosid 750 mq qiyməti

Meflosid 750 mq qiyməti və digər dərmanların qiymətləri müxtəlif amillərə bağlı olaraq dəyişkənlik göstərə bilər. İstehsalçı şirkət, tədarük zənciri və əczaçılıq bazarının dinamikləri bu qiymətlərin formalaşmasında mühüm rol oynayır. 

Ən gözəli budur ki, Doktorm.az  Platforması  ilə əməkdaşlıq edən Apteklər -dən bu günə olan Meflosid 750 mq qiyməti -ni öyrənərək əldə edəsiniz.

İstehsalçı

Drogsan İlaçları San. ve Tic. A.Ş.

06760Çubuk/Ankara/Türkiyə

Aid olduğu kateqoriyalar

1. Yuxarı tənəffüs yollarının digər xəstəliklərində istifadə olunan dərmanlar
2. Aşağı tənəffüs yollarının digər xəstəliklərində istifadə olunan dərmanlar
3. Böyrək və sidik  yollarının  iltihabında istifadə olunan dərmanlar
4. Prostatit zamanı istifadə olunan dərmanlar
5. Cinsi yolla keçən infeksiyaların müalicə və profilaktikası üçün dərmanlar
6. Qadın çanaq orqanlarının iltihabı xəstəliklərində istifadə olunan dərmanlar