EDARBİ KLO

RAAS-ın ikiqat blokadası

Angiotenzinçevirən ferment (AÇF) inhibitorlarının, angiotenzin II reseptorların blokatorlarının (ARB) və ya aliskirenin kombinasiya şəklində istifadəsinin hipotenziyanın və hiperkaliumemiyanın inkişaf etməsi və böyrək funksiyalarının zəifləməsi (kəskin böyrək çatışmazlığı da daxil olmaqla) riskinin yüksəlməsinə səbəb olması barədə təsdiq edilmiş məlumatlar mövcuddur. Bu səbəbdən, AÇF inhibitorlarının, ARB-nin və ya aliskirenin kombinasiya şəklində istifadəsi yolu ilə RAAS-ın ikiqat blokadasının aparılması tövsiyə olunmur (“Farmakodinamikası” və “Digər dərman vasitələri ilə qarşılıqlı təsiri” bölmələrinə bax).

İkiqat blokada ilə müalicənin aparılması mütləq zəruri olduğu halda, terapiya yalnız mütəxəssisin müşahidəsi altında və eləcə də, böyrək funksiyalarının, elektrolit tərkibin və arterail təzyiqin hərtərəfli nəzarəti fonunda aparılmalıdır. Diabetik nefropatiyalı pasiyentlərə AÇF inhibitorlarını ARB ilə eyni zamanda təyin etmək olmaz.

Aktivləşdirilmiş RAAS

Damar tonusu və böyrək funksiyaları əsasən RAAS-ın aktivliyindən asılı olan pasiyentlərdə (məsələn, durğunluq ürək çatışmazlığı və ya ilkin olaraq, böyrək arteriyalarının ikitərəfli stenozu da daxil olmaqla, böyrək çatışmazlığı qeyd olunan pasiyentlərdə) həmin sistemə təsir göstərən dərman preparatları, məsələn, AÇF inhibitorları və ARB ilə müalicə, kəskin hipotenziyanın, azotemiyanın, oliquriyanın və ya nadir hallarda, kəskin böyrək çatışmazlığının inkişaf etməsi ilə assosiasiya olunmuşdur. Edarbi® Klo preparatının istifadəsi zamanı analoji effektlərin inkişaf etmə ehtimalı istisna edilə bilməz.

Aktivləşdirilmiş RAAS ilə arterial hipertenziyalı pasiyentlərin müayinəsi böyrək funksiyalarının və elektrolit səviyyələrinin vaxtaşırı tədqiqatını əhatə etməlidir.

İşemik kardiomiopatiya və ya beyin qan qan dövranının işemik pozğunluğu qeyd olunan pasiyentlərdə arterial təzyiqin həddindən artıq aşağı düşməsi miokard infarktının və ya insultun meydana çıxmasına səbəb ola bilər.

Böyrək çatışmazlığı

Ağır böyrək çatışmazlığı (YFS < 30 ml/dəqiqədə/1,73 m2) qeyd olunan pasiyentlərdə Edarbi® Klo preparatının komponenti olan xlortalidondan istifadə etmək olmaz (“Əks göstərişlər” bölməsinə bax). Yüngül və ya orta dərəcəli böyrək çatışmazlığı qeyd olunan pasiyentlərdə korreksiyanın aparılması tələb olunmur.

Böyrək çatışmazlığından əziyyət çəkən pasiyentlərdə qan zərdabında kreatinin və elektrolit səviyyələrinin vaxtaşırı monitorinqi yolu ilə böyrək funksiyalarının pisləşməsinə nəzarət edilməlidir. Böyrək çatışmazlığından əziyyət çəkən pasiyentlərdə qan zərdabında kreatininin qeyri-normal yüksək göstəricilərinin qeyd olunma ehtimalı daha yüksəkdir. Həmin pasiyentlərdə Edarbi® Klo preparatının dəqiq titrlənməsi, arterial təzyiq səviyyəsinin və böyrək funksiyaları parametrlərinin monitorinqi altında aparılmalıdır. Böyrək arteriyasının stenozu qeyd olunan pasiyentlərdə böyrək funksiyaları pisləşə bilər.

Xlortalidon azotemiyanın inkişaf etməsini təhrik edə bilər və bu səbəbdən, böyrək çatışmazlığından əziyyət çəkən pasiyentlərdə xlortalidon ehtiyatla istifadə edilməlidir. Böyrək çatışmazlığı ciddi proqressivləşdiyi halda, diuretiklərlə müalicənin müvəqqəti və ya tamamilə dayandırılması barədə qərar qəbul edilməlidir.

Böyrək transplantasiyası

Hazırda, az müddət əvvəl böyrək transplantasiyası əməliyyatı keçirmiş pasiyentlərdə Edarbi® Klo preparatının istifadə təcrübəsi barədə heç bir məlumat yoxdur.

Qaraciyər çatışmazlığı

Ağır qaraciyər çatışmazlığı qeyd olunan pasiyentərdə Edarbi® Klo preparatının komponenti olan xlortalidondan istifadə etmək olmaz (“Əks göstərişlər” bölməsinə bax).

Qaraciyər funksiyalarının yüngül və ya orta dərəcəli pozğunluqları qeyd olunan pasiyentlərdə Edarbi® Klo preparatının istifadə təcrübəsi məhduddur; bununla belə, farmakokinetik məlumatlara əsaslanaraq, qaraciyər funksiyalarının yüngül və ya orta dərəcəli pozğunluqları qeyd olunan pasiyentlərdə Edarbi® Klo preparatının başlanğıc dozasının korreksiyası tələb olunmur. Tiazid diuretiklərin istifadəsi nəticəsində müşahidə olunan su-elektrolit balansının əhəmiyyətsiz dəyişiklikləri belə, qaraciyər komasının inkişaf etməsini təhrik edə bilər. Bu səbəbdən, göstərilən pasiyentlərin vəziyyətlərinin hərtərəfli monitorinqinin aparılması tövsiyə olunur (“Farmakokinetikası” bölməsinə bax)/

Dövr edən qan həcminin və ya duzların miqdarının azalması qeyd olunan pasiyentlərdə hipotenziya

Dövr edən qan həcminin və ya duzların miqdarının azalması qeyd olunan pasiyentlərdə (məsələn, qusma, diareya müşahidə olunan pasiyentlərdə və ya yüksək dozalarda diuretiklərdən istifadə edən pasiyentlərdə) Edarbi® Klo preparatının istifadəsini ciddi tibbi müşahidə altında başlamaq lazımdır (“İstifadə qaydası və dozası” bölməsinə bax). Edarbi® Klo preparatı ilə müalicə, dövr edən qan həcminin və/və ya duz miqdarının korreksiyası aparıldıqdan sonra başlanmalıdır.

Birincili hiperaldosteronizm

Birincili hiperaldosteronizm qeyd olunan pasiyentlər adətən, renin-angiotenzin sisteminin inhibə olunması yolu ilə təsir göstərən antihipertenziv dərman preparatları ilə müalicəyə cavab vermirlər. Bu səbəbdən, həmin pasiyentlərdə Edarbi® Klo preparatının istifadəsi tövsiyə olunmur.

Elektrolit disbalans

Diuretiklərdən istifadə edən bütün pasiyentlərdə olduğu kimi, vaxtaşırı qan zərdabında elektrolit səviyyələrinin müayinəsi aparılmalıdır.

Tiazidlərin istifadəsi maye və ya elektrolit balans pozğunluqlarının (hipokaliemiya, hiperkalsiemiya, hiponatriemiya və hipoxloremik alkaloz da daxil olmaqla) meydana çıxmasına səbəb ola bilər. Maye və ya elektrolit balans pozğunluqlarının xəbərdarlıq əlamətlərinə ağızda quruluq, susuzluq hissi, zəiflik, tormozlanma, yuxuya meyllilik, narahatlıq, əzələ ağrıları və ya spazmlar, əzələ zəifliyi, hipotenziya, oliquriya, taxikardiya və mədə-bağırsaq pozğunluqları, məsələn, ürəkbulanma və ya qusma aiddir (“Əlavə təsirləri” bölməsinə bax).

Edarbi® Klo preparatı ilə müalicəyə başlamazdan əvvəl su və elektrolit disbalans korreksiya edilməlidir.

Hipokaliemiya

Hipokaliemiya – xlortalidon ilə monoterapiya zamanı inkişaf edə bilən dozadan asılı arzuolunmayan reaksiyadır. Eyni zamanda azilsartan medoksomilin istifadəsi, xlortalidonun istifadəsi nəticəsində meydana çıxan hipokaliemiyanın şiddətini zəiflədir. Eyni zamanda digitalis (üskükotu) preparatlarının istifadəsi hipokaliemiya ilə əlaqəli arzuolunmayan effektlərin güclənməsinə səbəb ola bilər. Edarbi® Klo preparatı ilə müalicəyə başlamazdan əvvəl hipokaliemiya korreksiya edilməlidir.

Hiperkaliemiya

Edarbi® Klo preparatının komponenti olan azilsartan medoksomil angiotenzin II reseptorlarının antaqonistidir və hiperkaliemiyanın inkişaf etməsinə səbəb ola bilər. Edarbi® Klo preparatının istifadəsi müddətində klinik əhəmiyyətli hiperkaliemiyanın inkişaf etmə halları qeydə alınmamışdır, bununla belə, böyrək çatışmazlığı və/və ya ürək çatışmazlığı və eləcə də, şəkərli diabet kimi halların hiperkaliemiyanın inkişaf etməsi üçün risk faktorları olması nəzərə alınmalıdır. Edarbi® Klo preparatının istifadəsi müddətində eyni zamanda kaliumqoruyucu diuretiklər, kalium preparatları və kalium tərkibli duz əvəzediciləri ehtiyatla istifadə edilməlidir (“Digər dərman vasitələri ilə qarşılıqlı təsiri” bölməsinə bax).

Hiponatriemiya və hipoxloremik alkaloz

Tiazidlərin hiponatriemiyanın inkişaf etməsinə səbəb olması göstərilmişdir. Davamlı hiponatriemiya qeyd olunan pasiyentlərdə Edarbi® Klo preparatı istifadə edilməməlidir (“Əks göstərişlər” bölməsinə bax). Xlorid çatışmazlığı, adətən, əhəmiyyətli deyildir və müalicənin aparılması tələb olunmur.

Hiperkalsiemiya

Tiazidlər kalsiumun sidiklə xaricolmasını azalda bilər və kalsium metabolizmində məlum pozğunluqlar qeyd olunmadığı halda, qan zərdabında kalsium səviyyəsinin vaxtaşırı və bir qədər yüksəlməsinə səbəb ola bilər. Şiddətli hiperkalsiemiya latent (gizli) hiperparatireozun əlaməti ola bilər. Qalxanabənzər ətraf vəzilərin funksiyalarının tədqiqatını aparmazdan əvvəl tiazidlərin istifadəsi dayandırılmalıdır. Hiperkalsiemiyalı pasiyentlərdə Edarbi® Klo preparatı istifadə edilməməlidir (“Əks göstərişlər” bölməsinə bax).

Hipomaqneziemiya

Tiazidlərin maqneziumun sidiklə xaricolmasını gücləndirməsi və hipomaqneziemiyanın inkişaf etməsinə səbəb ola bilməsi təsdiq edilmişdir (“Digər dərman vasitələri ilə qarşılıqlı təsiri” bölməsinə bax).

Aortal və mitral qapaq stenozu, obstruktiv hipertrofik kardiomiopatiya

Damar genişlənməsinə və ya dövr edən qan həcminin azalmasına səbəb olan digər dərman preparatlarının istifadəsi zamanı olduğu kimi, aortal və ya mitral qapaq stenozu və eləcə də, hipertrofik obstruktiv kardiomiopatiya qeyd olunan pasiyentlərdə xüsusi ehtiyat tədbirlərinin aparılması tələb olunur.

Metabolik və endokrin effektləri

Tiazidlərin istifadəsi ilə aparılan müalicə qlükozaya qarşı tolerantlığın pozulmasına gətirib çıxara bilər və bu səbəbdən, insulinin dozasının və ya diabet əleyhinə müalicənin korreksiyası tələb oluna bilər. Tiazidlərlə müalicə müddətində latent şəkərli diabet meydana çıxa bilər. Tiazid diuretiklərin istifadəsi ilə müalicə xolesterin və triqliserid səviyyələrinin yüksəlməsi ilə assosiasiya olunmuşdur.

Hiperurikemiya

Xlortalidondan və ya digər diuretiklərdən istifadə edən bəzi pasiyentlərdə hiperurikemiyanın inkişaf etməsi və ya podaqranın kəskinləşməsi müşahidə oluna bilər. Simptomatik hiperurikemiya qeyd olunan pasiyentlərdə Edarbi® Klo preparatı istifadə edilməməlidir (“Əks göstərişlər” bölməsinə bax).

Hamiləlik dövrü

Hamiləlik dövründə Edarbi® Klo preparatından istifadə etmək olmaz (“Əks göstərişlər” bölməsinə bax).

Hamiləlik dövründə ARB təyin edilməməlidir. ARB ilə müalicənin davam etdirilməsi həyati göstərişlərə əsasən zəruri olmadığı halda, hamilə olmağı planlaşdıran qadın pasiyentlər, hamiləlik dövründə istifadəsi təsdiq edilmiş təhlükəsizlik profilinə malik olan alternativ antihipertenziv müalicəyə keçirilməlidirlər. Hamiləlik təsdiq olunduğu halda, ARB ilə aparılan müalicə dərhal dayandırılmalıdır və zərurət yarandığı halda, alternativ müalicəyə başlanmalıdır (“Əks göstərişlər” və “Hamiləlik və laktasiya dövründə istifadəsi” bölmələrinə bax).

Hamiləlik dövründə ödemlərin və ya arterial hipertenziyanın müalicəsi məqsədi ilə diuretiklərdən istifadə etmək olmaz (“Hamiləlik və laktasiya dövründə istifadəsi” bölməsinə bax).

Litium

Digər ARB-nin istifadəsi zamanı olduğu kimi, Edarbi® Klo preparatının və litiumun kombinasiya şəklində istifadəsi tövsiyə olunmur (“Digər dərman vasitələri ilə qarşılıqlı təsiri” bölməsinə bax).

Uşaqlar

Edarbi® Klo preparatının 0 yaşdan yuxarı uşaqlarda və < 18 yaşa qədər yeniyetmələrdə istifadəsinin təhlükəsizliyi və effektivliyi müəyyən edilməmişdir. Heç bir məlumat yoxdur.

Hamiləlik və laktasiya dövründə istifadəsi