Kantab plus 16mg/12,5mg

Kantab plus 16mg/12,5mg haqqında məlumatlar

Kantab plus 16mg/12,5mg qiyməti

Kantab plus 16mg/12,5mg qiyməti və digər dərmanların qiymətləri müxtəlif amillərə bağlı olaraq dəyişkənlik göstərə bilər. İstehsalçı şirkət, tədarük zənciri və əczaçılıq bazarının dinamikləri bu qiymətlərin formalaşmasında mühüm rol oynayır. Bu yazı yazılan tarixdə Kantab plus 16mg/12,5mg qiyməti 9 azn-12 azn arasında dəyişir.  

Ən gözəli budur ki, Doktorm.az  Platforması  ilə əməkdaşlıq edən Apteklər -dən bu günə olan  Kantab plus 16mg/12,5mg qiyməti-ni öyrənərək əldə edəsiniz.

Beynəlxalq patentləşdirilməmiş adı: Candesartan cilexetil/Hydrochlorothiazide

Kantab plus 16mg/12,5mg tərkibi

Təsiredici maddələr: 1 tabletin tərkibində 16 və ya 32 mq kandesartan sileksetil və 12,5 mq  hidroxlorotiazid vardır.
Köməkçi maddələr: laktoza monohidrat, qarğıdalı nişastası, polietilenqlikol 8000 P (Makroqol), aşağı əvəzlənmiş hidroksipropilsellüloza (L-HPC (hidroksipropilsellüloza), kalsium karboksimetilsellüloza (kalsium karmelloza), maqnezium stearat, sarı dəmir oksidi (E172).

Təsviri

Uzunsov, açıq-sarı rəngli, bir tərəfdən bölünən tabletlərdir.

Farmakoterapevtik qrupu

Kombinəolunmuş hipotenziv dərman vasitəsi. Angiotenzin II reseptorlarının antaqonisti və diuretik.
ATC kodu: C09DA06.

Farmakoloji xüsusiyyətləri

Kantab plus 16mg/12,5mg nə üçündür?

Farmakodinamikası
Angiotenzin II renin-angiotenzin-aldosteron sisteminin ilkin vazoaktiv hormonudur və hipertenziyanın, ürək çatışmazlığının və digər ürək-damar xəstəliklərinin patofiziologiyasında vacib rol oynayır. Onun həmçinin orqanların hipertrofiyasının və zədələrin son mərhələsinin patogenezində rolu var. Damarların daralması, aldosteronun stimullaşdırılması, su-duz homeostazının tənzimlənməsi və hüceyrələrin böyüməsinin stimullaşdırılması kimi angiotenzin II-nin əsas fizioloji təsirləri I tip (AT1) reseptor hesabına baş verir.
Kandesartan sileksetil peroral istifadə üçün nəzərdə tutulan prodərmandır. O, mədə-bağırsaq traktında efir hidrolizi zamanı absorbsiya olunaraq, sürətli şəkildə aktiv maddə olan kandesartana çevrilir. Kandesartan AIIRA olub, AT1-reseptorlarına selektiv sıx bağlanılır və yavaş dissosiasiya olunur. Onun aqonist aktivliyi yoxdur.
Kandesartan sileksetili AÇF inhibitorları ilə müqayisə edən nəzarətli klinik tədqiqatlarda kandesartan sileksetili qəbul edən xəstələrdə öskürək hallarına daha nadirən rast gəlinir.
Kandesartan digər hormon reseptorlarını və ya ürək-damar sisteminin tənzimlənməsində rolu olan ion kanallarını bağlamır və onları blokada etmir. Angiotenzin II (AT1) reseptorlarının antaqonizmi plazmada renin səviyyəsinin, angiotenzin I və angiotenzin II səviyyələrinin dozadan asılı artması və plazmada aldosteronun konsentrasiyasının azalması ilə nəticələnir.
Hidroxlorotiazid plazma və hüceyrədənkənar mayenin həcmini azaldır və ürək döyüntülərini və qan təzyiqini aşağı salır. Uzunmüddətli müalicə zamanı periferik müqavimətin aşağı düşməsinə qan təzyiqinin enməsinə gətirib çıxarır.
Geniş miqyaslı klinik tədqiqatlar hidroxlorotiazidlə uzunmüddətli müalicənin ürək-damar xəstəliklərini və ölüm riskini azaltdığını göstərmişdir.
Kandesartan və hidroxlorotiazidin birlikdə daha üstün antihipertenziv təsirləri vardır.
Kandesartan sileksetil/hidroxlorotiazidin effekti pasiyentin yaşından və cinsindən asılı olmayaraq eyni qalır.
Farmakokinetikası
Kandesartan sileksetil və hidroxlorotiazidin kombinasiya şəklində istifadəsi hər iki dərman vasitəsinin farmakokinetikasına heç bir klinik əhəmiyyətli təsir göstərmir.

Absorbsiyası və paylanması
Kandesartan sileksetil
Peroral qəbul edildikdən sonra kandesartan sileksetil aktiv maddə olan kandesartana çevrilir.
Kandesartan sileksetilin oral məhlulunu qəbul etdikdə mütləq biomənimsənilməsi təxminən 40 % təşkil edir. Oral məhlul ilə müqayisədə tablet formasının nisbi biomənimsənilməsi çox az dəyişiklik ilə təxminən 34 % təşkil edir. Qan plazmasının ortalama pik konsentrasiyası (Cmax) tablet qəbul edildikdən 3-4 saat sonra baş verir. Kandesartan plazma zülallarına sıx birləşir (99 %-dan artıq). Kandesartanın paylanmasının aşkar həcmi 0,1 l/kq-dır.
Kandesartanın biomənimsənilməsinə qidanın təsiri yoxdur .
Hidroxlorotiazid
Hidroxlorotiazid mədə-bağırsaq traktından sürətlə sorulur və biomənimsənilməsi təxminən 70 %-dir. Qida ilə birgə qəbulu absorbsiyanı təxminən 15 % artırır. Ürək çatışmazlığı və nəzərə çarpan ödemi olan xəstələrdə biomənimsənilmə azala bilər.
Hidroxlorotiazidin plazma zülalları ilə birləşməsi təxminən 60 %-dir. Paylanmanın aşkar həcmi təqribən 0,8 l/kq-dır.
Biotransformasiyası və eliminasiyası
Kandesartan sileksetil
Kandesartan əsasən dəyişilməmiş şəkildə sidik və öd vasitəsilə və yalnız az miqdarda qaraciyər metabolizmi (CYP2C9) ilə xaric edilir. Kandesartanın terminal yarımparçalanma dövrü (T½) təxminən 9 saatdır. Dozanın təkrar qəbulu akkumulyasiyaya səbəb olmur.
Kandesartanın ümumi plazma klirensi təxminən 0,37 ml/dəq/kq təşkil edir, böyrək klirensi ilə 0,19 ml/dəq/kq. 14C-nişanlanmış kandesartan sileksetilin peroral dozasının qəbulundan sonra təxminən dozanın 26 %-i kandesartan şəklində sidik və 7 %-i isə qeyri-aktiv metabolit qismində xaric olunur, kandesartan dozasının 56 %-i nəcislə və 10 %-i qeyri-aktiv metabolit kimi xaric olunur.
Hidroxlorotiazid
Hidroxlorotiazid metabolizə olunmur və dəyişməz halda demək olar ki, tamamilə qlomerulyar filtrasiya və aktiv boru sekresiyası ilə xaric olunur. Hidroxlorotiazidin yarımparçalanma dövrü təxminən 8 saatdır. Peroral dozanın təxminən 70 %-i 48 saat ərzində sidiklə xaric olunur.
Xüsusi əhali qruplarında farmakokinetikası
Kandesartan sileksetil
Gənc xəstələrlə müqayisədə yaşlı insanlarda (65 yaşdan yuxarı) Cmax və kandesartanın
AUC-göstəricisi müvafiq olaraq təxminən 50 % və 80 % yüksəlir. Lakin, kandesartan sileksetil/hidroxlorotiazidin qan təzyiqinə təsiri və əlavə təsirlərin rast gəlmə tezliyi gənc və yaşlı xəstələrdə eynidir.
Hidroxlorotiazid
Hidroxlorotiazidin terminal yarımparçalanma dövrü T½ böyrək çatışmazlığı olan xəstələrdə uzanır. 

İstifadəsinə göstərişlər

Qan təzyiqi kandesartan sileksetil və ya hidroxlorotiazidin monoterapiyası ilə optimal nəzarət olunmayan xəstələrdə hipertoniyanın müalicəsi üçün Kantab® Plyus göstərişdir.

Kantab plus 16mg/12,5mg əks göstərişlər

• Aktiv maddəyə və ya hər hansı köməkçi vasitələrə və ya sulfonamid törəmələri olan aktiv maddələrə qarşı yüksək həssaslıq. Hidroxlorotiazid sulfonamid törəməsindən olan aktiv maddədir.
• Hamiləliyin ikinci və üçüncü trimestri.
• Ağır böyrək çatışmazlığı (kreatinin klirensi < 30 ml/dəq/1,73 m2 BSS).
• Ağır qaraciyər çatışmazlığı və/və ya xolestaz.
• Refrakter hipokaliemiya və hiperkalsiemiya.
• Podaqra xəstəliyi

Xüsusi göstərişlər/ehtiyyat tədbirləri

Böyrək arteriyası stenozu
Renin-angiotenzin-aldosteron sisteminə təsir göstərən dərmanlar, o cümlədən, angiotenzin II reseptorlarının antaqonistləri (AIIRA), böyrək arteriyalarının iki tərəfli stenozu yaxud tək böyrək arteriya stenozu olan xəstələrdə qanda sidiyin miqdarını və zərdab kreatinini artıra bilər.
Anesteziya və cərrahiyyə
Angiotenzin II reseptorlarının antaqonistləri ilə müalicə alan xəstələrdə anesteziya və cərrahiyyə zamanı renin-angiotenzin sisteminin blokadası səbəbindən hipotenziya baş verə bilər. Çox nadir hallarda, ağır hipotenziya səbəbindən venadaxili mayelərin və/və ya vazopressorların istifadəsinə ehtiyac yarana bilər.
Aorta və mitral qapağın stenozu (obstruktiv hipertrofik kardiomiopatiya)
Digər vazodilatatorlarla olduğu kimi, hemodinamik aorta və ya mitral qapağın stenozu səbəbindən, və ya obstruktiv hipertrofik kardiomiopatiyadan əziyyət çəkən xəstələrdə xüsusilə ehtiyatlı olmaq lazımdır.
Birincili hiperaldosteronizm
Bu qrup əhalidə Kantab® Plyus-un istifadəsi tövsiyə edilmir.
Elektrolit disbalansı
Zərdab elektrolitlərinin dövri olaraq müəyyən edilməsi müvafiq intervallarla həyata keçirilməlidir.
Tiazidlər, o cümlədən hidroxlorotiazid daxil olmaqla, maye və ya elektrolit disbalansına (hiperkalsiemiya, hipokaliemiya, hiponatriemiya, hipomagnezemiya və hipoxlorik alkaloz) səbəb ola bilər.
Tiazid diuretiklər sidiklə kalsiumunun ifrazını azalda bilər və qan zərdabında kalsiumun konsentrasiyasının periodik və yüngül artımına səbəb ola bilər. Nəzərəçarpan hiperkalsiemiya gizli hiperparatiroidizm əlaməti ola bilər. Paratiroid funksiya testi edilmədən əvvəl tiazidlər dayandırılmalıdırlar.
Hidroxlorotiazid hipokaliemiya ilə nəticələnə bilən, dozadan asılı sidik kaliumunun ifrazını artırır. Hidroxlorotiazidin bu təsiri görünür ki, kandesartan sileksetil ilə birlikdə kombinasiya olduqda daha az nəzərə çarpır. Hipokaliemiya riski qaraciyər sirrozu, kəskin diurezi olan, elektrolitləri peroral şəkildə nizamsız qəbul edən və kortikosteroid və ya adrenokortikotrop hormonlarla (AKTH) yanaşı müalicə alan xəstələrdə arta bilər.
Kandesartan sileksetil ilə müalicə, xüsusilə də ürək çatışmazlığı və/və ya böyrək çatışmazlığı olan xəstələrdə, hiperkaliemiyaya səbəb ola bilər. Kantab® Plyus-la qan plazmasında kaliumun səviyyəsinin artmasına səbəb ola bilən kalium qoruyucu diuretiklərin, kalium əlavələrinin və ya duz əvəzedicilərinin və ya digər dərman vasitələrinin (məsələn, heparin natrium) eyni vaxtda qəbul edilməsi zərdabda kaliumun artmasına səbəb ola bilər. Kalium monitorinqi diqqətli şəkildə
həyata keçirilməlidir.
Tiazidlərin qəbulu sidiklə maqneziumun ifrazının artmasına gətirib çıxarır, bu isə hipomaqneziyemiya ilə nəticələnə bilər.
Metabolik və endokrin təsirlər
Tiazid diuretiklərlə müalicə qlükozaya müqaviməti zəiflədə bilər. Antidiabetik dərmanların, o cümlədən insulinin, dozasının tənzimlənilməsi tələb oluna bilər. Tiazidlərlə müalicə zamanı gizli şəkərli diabet aşkar oluna bilər. Xolesterin və triqliseridlərin səviyyəsinin artması tiazid diuretiklərlə müalicə ilə bağlı olur. Kantab® Plyus-da olan dozalarda yalnız minimal təsirlər müşahidə edilmişdir. Tiazid diuretiklər qan plazmasında sidik turşusunun konsentrasiyasını artırır və həssas xəstələrdə podaqra xəstəliyinin yaranmasına səbəb ola bilər.
Fotosensibilizasiya
Tiazid diuretiklərin istifadəsi zamanı fotosensibilizasiya reaksiyaları halları qeydə alınmışdır.
Fotosensibilizasiya reaksiyası baş verdiyi halda müalicəni dayandırmaq tövsiyə olunur.
Müalicənin yenidən başlanması vacib olduqda günəş işığından və ya ultra bənövşəyi şüalanma radiasiyasından qorumaq tövsiyə olunur.

Hamiləlik və laktasiya dövründə istifadəsi

Hamiləlik
Angiotenzin II reseptorlarının antaqonistləri (AIIRA)
AIIRA (Angiotenzin II Reseptorlarının Antaqonistləri) istifadəsi hamiləliyin ilk trimestri ərzində məsləhət görülmür. Hamiləliyin ikinci və üçüncü trimestri ərzində AIIRA-in istifadəsi əks göstərişdir.
Hidroxlorotiazid
Hamiləlik dövründə, xüsusilə birinci trimestr ərzində hidroxlorotiazidin istifadəsi ilə bağlı məlumatlar məhduddur. Heyvanlar üzərində tədqiqatlar kifayət qədər deyil.
Hidroxlorotiazid plasentar baryerdən keçir. Hidroxlorotiazidin farmakoloji təsir mexanizminə əsaslanaraq onun ikinci və üçüncü trimestr ərzində istifadəsi fetoplasentar perfuziya təhlükəsi yarada bilər və sarılıq, elektrolit balansın pozulması və trombositopeniya kimi fetal və neonatal təsirlərə səbəb ola bilər.
Plazma həcminin və plasentar perfuziyanın azalması riski və xəstəliyin gedişatına müsbət təsiri olmadığından hidroxlorotiazid hestasiya ödemi, hestasion hipertenziya və ya preeklampsiya zamanı istifadə edilməməlidir.
Başqa heç bir dərman istifadə edilə bilmədiyi nadir hallar istisna olmaqla, hidroxlorotiazid hamilə qadınlarda hipertoniya zamanı istifadə edilməməlidir.
Laktasiya
Angiotenzin II reseptorlarının antaqonistləri (AIIRA) 

Laktasiya dövründə Kantab® Plyus-un istifadəsi ilə bağlı heç bir məlumat mövcud olmadığından,
Kantab Plyus tövsiyə edilmir və laktasiya dövründə daha yaxşı təhlükəsizlik profili müəyyən edilmiş alternativ müalicə üsulları, xüsusilə də yeni və ya erkən doğulmuş körpələrin ana südü ilə qidalandırılması zamanı daha üstün hesab edilirlər.
Hidroxlorotiazid
Hidroxlorotiazid kiçik miqdarda ana südünə keçir. Tiazidlər yüksək dozalarda diurezin intensivləşməsinə səbəb olaraq süd ifrazını inhibə edə bilər. Kantab® Plyus-un laktasiya dövründə istifadəsi məsləhət görülmür.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri

Nəqliyyat vasitələrini və digər mexanizmlərdən idarə etmək qabiliyyətinə təsiri barədə tədqiqatlar keçirilməmişdir. Nəqliyyat vasitələrinin idarəsi və ya mexanizmlərin istifadə edilməsi zamanı nəzərə almaq lazımdır ki, Kantab® Plyus ilə müalicə zamanı bəzən başgicəllənmə və ya yorğunluq hissi yarana bilər.

Kantab plus 16mg/12,5mg istifadə qaydası və dozası

İstifadə qaydası
Peroral istifadə.
Kantab Plyus qida ilə və ya qidasız qəbul edilə bilər.
Dozalanma
Kantab Plyus-un tövsiyə olunan dozası gündə bir dəfə bir tablet təşkil edir.
Ayrı-ayrı komponentlər (kandesartan sileksetil və hidroxlorotiazid) ilə dozanın titrasiyası tövsiyə olunur. Klinik cəhətdən məqsədə uyğundursa monoterapiyadan Kantab® Plyus ilə müalicəyə keçmə nəzərdə tutula bilər. Hidroxlorotiazidlə monoterapiyadan kandesartan sileksetilə keçid zamanı dozasının titrasiyası tövsiyə olunur. Kandesartan sileksetil və ya hidroxlorotiazidlə monoterapiya zamanı qan təzyiqinə optimal nəzarət əldə olunmayan xəstələrə Kantab® Plyus təyin oluna bilər.
Antihipertenziv təsirin böyük hissəsi adətən müalicənin başlanmasından 4 həftə ərzində əldə olunur.
Xüsusi qrup xəstələr
Yaşlı əhali
Yaşlı xəstələrdə dozanın korreksiyasına ehtiyac yoxdur.
Damardaxili həcmin azalması olan xəstələr
Mümkün damardaxili həcmin azalması olan xəstələrdə olduğu kimi, hipotenziya riski (belə xəstələrdə kandesartan sileksetil ilkin doza kimi 4 mq baxıla bilər) olan xəstələrdə kandesartan sileksetilin dozasının titrasiyası tövsiyə olunur.
Böyrək çatışmazlığı olan xəstələr
Bu qrup əhalidə ilgək diuretiklərin istifadəsi tiazidlərlə müqayisədə daha üstündürlər. Kantab®
Plyus ilə müalicəyə başlamamışdan əvvəl (kandesartan sileksetil başlanğıc tövsiyə olunan dozası bu xəstələrdə 4 mq-dır) kandesartan sileksetilin dozasının titrasiyası yüngül və orta böyrək çatışmazlığı olan xəstələrdə tövsiyə olunur (kreatinin klirensi ≥ 30 ml/dəq/1,73 m2 bədənin səthinin sahəsi (BSS)).
Kantab Plyus ağır böyrək çatışmazlığı (kreatinin klirensi < 30 ml/dəq/1,73 m2 BSS) olan xəstələrə əks göstərişdir.
Qaraciyər çatışmazlığı olan xəstələr
Kandesartan sileksetilin dozasının titrasiyası Kantab® Plyus-la müalicədən əvvəl yüngül və orta qaraciyər çatışmazlığı olan xəstələrdə tövsiyə edilir (bu xəstələrdə kandesartan sileksetilin tövsiyə edilən başlanğıc dozası 4 mq təşkil edir).
Uşaqlarda istifadə
Kantab® Plyus-un 18 yaşa qədər olan uşaqlarda isifadəsi zamanı təhlükəsizliyi və effektivliyi müəyyən edilməmişdir. Məlumatlar mövcud deyil.

Əlavə təsirləri

Aşağıda kandesartan sileksetil ilə klinik tədqiqatlar və post-marketinq araşdırmalar zamanı qeyd olunmuş əlavə təsirlər göstərilmişdir.
Əlavə təsirləri göstərmək üçün istifadə olunan tezliklər: çox tez-tez (≥ 1/10); tez-tez (≥ 1/100- dən < 1/10-dək); bəzən (≥ 1/1000-dən < 1/100-dək); nadir (≥ 1/10000-dən < 1/1000-dək); çox nadir (< 1/10000).

• İnfeksiyalar və invaziyalar
• Tez-tez: tənəffüs infeksiyaları.
• İmmun sistemdə baş verən pozğunluqlar
• Nadir: anafilaktik reaksiyalar.
• Qan və limfa sistemində baş verən pozğunluqlar
• Nadir: trombositopeniya, aplastik anemiya, sümük iliyinin depressiyası, hemolitik anemiya.
• Çox nadir: leykopeniya, neytropeniya və aqranulositoz.
• Ürəkdə baş verən pozğunluqlar
• Nadir: ürək aritmiyası.
• Damarda baş verən pozğunluqlar
• Bəzən: ortostatik hipotenziya.
• Nadir: nekrotik angiit (vaskulit, dəri vaskuliti).
• Maddələr mübadiləsi və qidalanmada baş verən pozğunluqlar
• Tez-tez: hiperqlikemiya, hiperurikemiya.
• Çox nadir: hiperkaliemiya, hiponatriemiya.
• Sinir sistemində baş verən pozğunluqlar
• Tez-tez: başgicəllənmə/vertigo, baş ağrısı.
• Nadir: paresteziya.
• Tənəffüs, döş və divararalığı orqanlarında baş verən pozğunluqlar
• Nadir: tənəffüs çətinliyi (pnevmoniya və ağciyər ödemi daxil olmaqla).
• Çox nadir: öskürək.
• Mədə-bağırsaq traktında baş verən pozğunluqlar
• Bəzən: anoreksiya, iştahasızlıq, mədə qıcıqlanması, diareya, qəbizlik.
• Nadir: pankreatit.
• Çox nadir: ürəkbulanma.
• Hepato-biliar pozğunluqlar
• Nadir: sarılıq (intrahepatik xolestatik sarılıq).
• Çox nadir: qaraciyər fermentləri səviyyəsinin artması, qaraciyər funksiyasının pozulması və ya hepatit.
• Dəri və dərialtı toxumalarda baş verən pozğunluqlar
• Bəzən: fotosensibilizasiya reaksiyaları.
• Nadir: toksik epidermal nekroliz, qırmızı qurdeşənəyinə bənzər reaksiyalar, qurdeşənəyi xəstəliyinin reaktivasiyası.
• Çox nadir: angioödem, səpgi, övrə, qaşınma.
• Əzələ-skelet və birləşdirici toxumada baş verən pozğunluqlar
• Nadir: əzələ spazmı.
• Çox nadir: beldə ağrı, artralgiya, mialgiya.
• Böyrək və sidik çıxarıcı yollarda baş verən pozulmalar
• Tez-tez: qlükozuriya.
• Nadir: böyrək disfunksiyası və interstisial nefrit.
• Çox nadir: böyrək çatışmazlığı, o cümlədən böyrək çatışmazlığına həssas olan xəstələrdə.
• Psixi pozulmalar
• Nadir: yuxu pozuntuları, depressiya, narahatlıq.
• Görmədə baş verən pozğunluqlar
• Nadir: bulanıq görmə.
• Ümumi pozğunluqlar və yeridilmə zamanı yaranan pozğunluqlar
• Tez-tez: ümumi zəiflik.
• Nadir: qızdırma.
• Laborator göstəricilər
• Tez-tez: xolesterinin və triqliseridlərin artması.
• Nadir: qanda sidik cövhəri azotunun və zərdab kreatininin artması.

DƏRMAN QƏBULU ZAMANI GÖZLƏNİLMƏZ REAKSİYALAR YARANDIQDA HƏKİMİNİZƏMÜRACİƏT EDİN!

Buraxılış forması

Kantab Plyus 16 mq/12,5 mq

14 tablet, şəffaf PVX/PE/PVDX-Al blisterdə, 2 blister (28 tablet) içlik vərəqə ilə birlikdə karton qutuda qablaşdırılır.
Kantab Plyus 32 mq/12,5 mq 14 tablet, şəffaf PVX/PE/PVDX-Al blisterdə, 2 blister (28 tablet) içlik vərəqə ilə birlikdə karton qutuda qablaşdırılır.

Saxlanma şəraiti

25 ºC-dən aşağı temperaturda orijinal qutusunda və uşaqların əli çatmayan yerdə saxlamaq lazımdır.

Yararlılıq müddəti

2 il. Yararlılıq müddəti bitdikdən sonra istifadə etmək olmaz.

Aptekdən buraxılma şərti

Resept əsasında buraxılır.

İstehsalçı

NOBEL İLAÇ SANAYİİ VE TİCARET A.Ş.
Sancaklar 81100 Düzce/Türkiye.
Lisenziya sahibi
NOBEL İLAÇ SANAYİİ VE TİCARET A.Ş.
Ümraniye 34768 İstanbul/Türkiye.

Aid olduğu kateqoriyalar

1. Beyin qan dövranı pozğunluğunda istifadə olunan dərmanlar
2. İnsult zamanı istifadə olunan dərmanlar
3. Hipertoniya zamanı istifadə olunan dərmanlar