Groprinosin Rixter sirop nə üçündür?

Groprinosin Rixter haqqında məlumat

Groprinosin Rixter qiyməti

Groprinosin sirop qiyməti və digər dərmanların qiymətləri müxtəlif amillərə bağlı olaraq dəyişkənlik göstərə bilər. İstehsalçı şirkət, tədarük zənciri və əczaçılıq bazarının dinamikləri bu qiymətlərin formalaşmasında mühüm rol oynayır. Bu yazı yazılan tarixdə Groprinosin Rixter qiyməti 18 azn - 21 azn arasında dəyişir.  

Ən gözəli budur ki, Doktorm.az  Platforması  ilə əməkdaşlıq edən Apteklər -dən bu günə olan Qroprinosin Rixter qiyməti -ni öyrənərək əldə edə bilərsiniz.

QROPRİNOSİN-RİXTER şərbət
GROPRINOSIN®-RICHTER

Beynəlxalq patentləşdirilməmiş adı: İnosine pranobex

Tərkibi

Təsiredici maddə: 5 ml şərbətin tərkibində 250,00 mq inozin pranobeks vardır.

Köməkçi maddələr: saxaroza, metilparahidroksibenzoat (E 218), propilparahidroksibenzoat (E216), natrium hidroksid (E 524), limon turşusu monohidrat (E 330) təmizlənmiş su.

Təsviri

Şəffaf, şirin dada malik mayedir.

Farmakoterapevtik qrupu

Birbaşa təsirli virusəleyhinə preparatlar.

ATC kodu: J05AX05.

Farmakoloji xüsusiyyətləri

Farmakodinamikası
Preparatın aktiv maddəsi olan inozin pranobeks (inozinin və N,N-dimetilamino-2-propanolun 4-asetamidbenzoy turşusunun duzu ilə 1:3 molyar nisbətində molekulyar kompleksi), birbaşa virusəleyhinə və immunomodullaşdırıcı təsir göstərir. Preparatın birbaşa virusəleyhinə təsiri virus tərəfindən zədələnmiş hüceyrələrin ribosomları ilə birləşməsilə əlaqədardır ki, bu da, virus m-RNT-nin sintezini ləngidir (transkripsiyanın və translyasiyanın pozulması) və RNT- və DNT-genom virusların replikasiyasının tormozlanmasına səbəb olur; dolayı təsir – interferonun əmələ gəlməsinin güclü induksiyası ilə izah olunur. İmmunomodullaşdırıcı effekti T-limfositlərə təsirilə (sitokinlərin sintezinin aktivləşdirilməsi) və makrofaqların faqositar aktivliyinin yüksəlməsi ilə əlaqədardır. Preparatın təsiri altında pre-T-limfositlərin differensiasiyası güclənir, mitogenlər tərəfindən induksiya olunmuş T- və B-limfositlərin proliferasiyası stimullaşdırılır, T-limfositlərin funksional aktivliyi, o cümlədən, onların limfokinlər əmələ gətirmə qabiliyyəti yüksəlir, T-xelperlər və T-supressorlar subpopulyasiyaları arasında nisbət normalaşır (CD4/CD8 immunorequlyasiya indeksi bərpa olunur). İnozin pranobeks limfositlər tərəfindən interleykin-2-nin hasilatını gücləndirir və limfoid hüceyrələr üzərində bu interleykin üçün reseptorların ekspressiyasına səbəb olur; eləcə də, hətta saglam insanlarda belə təbii killerlərin (NK-hüceyrələrin) aktivliyini stimullaşdırır; makrofaqların faqositoza, antigen prosessinqinə və prezentasiyasına qarşı aktivliyini stimullaşdırır ki, bu da, müalicənin ilk günlərindən orqanizmdə antitel hasil edən hüceyrələrin artmasına səbəb olur. Preparat ,eləcə də, interleykin-1-in sintezini, mikrobisidliyi, membran reseptorlarının ekspressiyasını və limfokinlərə və xemotaksik faktorlara qarşı reaksiya qabiliyyətini stimullaşdırır. Herpetik infeksiya zamanı spesifik herpesəleyhinə antitellərin əmələ gəlməsi əhəmiyyətli dərəcədə sürətlənir, residivlərin klinik təzahürləri və residivin tezliyi azalır.

Farmakokinetikası
İnozin pranobeksin hər bir komponenti özünəməxsus farmakoloji xüsusiyyətlərə malikdir.

Sorulması
İnozin pranobeksi daxilə qəbul etdikdə, insan orqanizmində mədə-bağırsaq sistemindən sürətlə və demək olar ki, tamamilə sorulur (≥ 90 %-i) və qana nüfuz edir.

Metabolizmi
İnozin pranobeksi 1 q dozada daxilə qəbul etdikdə, qan plazmasında 3,7 mkq/ml DİP (N,N-dimetilamino-2-propanol) (2 saatdan sonra) və 9,4 mkq/ml PAcBA (p-asetaminobenzoy turşusu) (1 saatdan sonra) müəyyən olunmuşdur. Preparatın qəbulundan sonra sidik turşusunun konsentrasiyasının yüksəlməsi (preparatın tərkibində olan inozinin miqdarı kimi qiymətləndirilir), qeyri-xətti xarakter daşıyır və 1-3 saat müddətində ±10 % çərçivəsində dəyişir. İnsan orqanizmində əsas metabolitlər DİP üçün N-oksid və PAcBA üçün o-asilqlükuronid olmuşdur.

Xaric olması

Sutkada 4 q dozada müntəzəm istifadə edildikdə, PAcBA-nın və onun əsas metabolitinin sutkalıq ekskresiyası, yeridilən dozanın təqribən 85%-ni təşkil edir. Yarımxaricolma dövrü DİP üçün 3,5 saat və PAcBA üçün 50 dəqiqə təşkil edir.

İstifadəsinə göstərişlər

250 mq/5 ml Qroprinosin-Rixter şərbətinin istifadəsi ilk növbədə 3-6 yaşa qədər uşaqlar üçün aşağıdakı hallarda göstərişdir:

- I-ci və ya II-ci növ sadə herpes viruslarının (sadə herpes) törətdikləri dəri və selikli qişanın infeksiyaları.
- Yarımkəskin sklerozlaşan panensefalit.

- İmmunitetləri zəif olan şəxslərdə yuxarı tənəffüs yollarının residivləşən infeksiyalarının əlavə müalicəsi.
6 yaşdan yuxarı (bədən kütləsi 21 kq-dan artıq) pasiyentlərdə Qroprinosin tabletlərindən istifadə etmək məqsədəuyğundur, bu tabletləri çeynəmək, istifadə etməzdən bilavasitə əvvəl xırdalamaq və/və ya bir qədər suda həll etmək olar.

Əks göstərişlər

- Preparatın istənilən komponentinə qarşı yüksək həssaslıq.

- Podaqra tutması.

- Böyrək daşı xəstəliyi.

- III dərəcəli ağır böyrək çatışmazlığı.

- Qan zərdabında sidik turşusunun konsentrasiyasının yüksəlməsi.

- 3 yaşa qədər uşaqlar.

Xüsusi göstərişlər və ehtiyat tədbirləri

Ehtiyatla

Ksantinoksidaza fermentinin inhibitorları ilə (məsələn, allopurinol), tiazid diuretiklər (məsələn, hidroxlortiazid, xlortalidon, indapamid) və ilgək diuretikləri (məsələn, furosemid, torasemid, etakrin turşusu) daxil olmaqla, sidik turşusunun böyrəklər vasitəsi ilə xaric olmasını gücləndirən preparatlarla eyni zamanda, anamnezdə podaqra və ya böyrək funksiyalarının pozulması olduqda.
Qroprinosin-Rixter şərbəti, bir qayda olaraq, norma göstəriciləri çərçivəsində (normanın yuxarı həddi 8 mq/dl təşkil edir ki, bu da 420 mmol/l-ə müvafiqdir), xüsusilə kişilərdə və hər iki cinsdən olan yaşlı pasiyentlərdə qan zərdabında və sidikdə sidik turşusunun konsentrasiyasının tranzitor yüksəlməsinə səbəb ola bilər. Sidik turşusunun konsentrasiyasının yüksəlməsi, göstərilən preparatın tərkibinə daxil olan inozin komponentinin, insan orqanizmində baş verən katabolizmi ilə əlaqəlidir. Lakin bunun preparatın təsiri altında fermentlərin funksiyalarının qlobal pozulması və ya böyrəklərin ifrazedici funksiyasının pozulması ilə əlaqəsi yoxdur. Beləliklə, anamnezində podaqra olan, hiperurikemiya, sidik daşı xəstəliyi və ya böyrək funksiyasının pozuntusu olan pasiyentlərdə, o cümlədən, bu patologiyalar anamnezində olan pasiyentlərdə Qroprinosin-Rixter preparatını ehtiyatla istifadə etmək lazımdır. Belə pasiyentlərdə müalicə dövründə sidik turşusunun konsentrasiyasına diqqətlə nəzarət etmək lazımdır.

Uzunmüddətli müalicə alan pasiyentlərdə böyrəklərdə daşın yaranması ehtimalı mövcuddur. Uzunmüddətli (3 ay və ya daha çox müddət ərzində) müalicə aparıldıqda, hər bir pasiyentdə qan zərdabında və sidikdə sidik turşusunun konsentrasiyasına, qaraciyər funksiyasına, qanın ümumi analizinə və böyrək funksiyasına müntəzəm nəzarət etmək lazımdır.

Bəzi pasiyentlərdə ağır hiperhəssaslıq reaksiyaları (övrə, angionevrotik ödem, anafilaksiya, anafilaktik şok) inkişaf edə bilər. Belə hallarda Qroprinosin-Rixter preparatının istifadəsini dayandırmaq lazımdır.

Qroprinosin-Rixter preparatının tərkibində allergik reaksiyaların (ləng gedişli allergik reaksiyalar mümkündür) meydana çıxmasına səbəb ola bilən metilparahidroksibenzoat və propilparahidroksibenzoat vardır.

Qroprinosin-Rixter şərbətinin 1 ml-də 650 mq saxaroza vardır. Şəkərli diabeti olan pasiyentlərdə bunu nəzərə almaq lazımdır. Qroprinosin-Rixter preparatının fruktozaya qarşı dözümsüzlük, qlükoza-qalaktoza sorulmasının pozulması və ya saxaraza-izomaltaza çatışmazlığı kimi nadir irsi xəstəlikləri olan pasiyentlərdə istifadə etmək olmaz.

Digər dərman vasitələri ilə qarşılıqlı təsiri

Ksantinoksidaza fermentinin inhibitorlarından (məsələn, allopurinol), tiazid diuretiklər (məsələn, hidroxlortiazid, xlortalidon, indapamid) və ilgək diuretikləri (məsələn, furosemid, torasemid, etakrin turşusu) daxil olmaqla, sidik turşusunun böyrəklər vasitəsi ilə xaric olmasını gücləndirən preparatlardan eyni vaxtda istifadə edən pasiyentlərdə Qroprinosin-Rixter preparatını ehtiyatla istifadə etmək lazımdır.

Qroprinosin-Rixter şərbətini, yalnız immunodepressantların istifadəsini dayandırdıqdan sonra təyin etmək olar. Gözlənilən müalicəvi effektə təsir göstərə bilən farmakokinetik təsir ehtimalını nəzərə alaraq, bu dərman vasitəsini immunodepressantlarla eyni vaxtda istifadə etmək olmaz. Zidovudinlə (azidotimidinlə) eyni zamanda istifadə edildikdə, müxtəlif mexanizmlər vasitəsilə zidovudin tərəfindən nukleotidlərin əmələ gəlməsini gücləndirir ki, bu da, zidovudinin zərdab biomənimsənilməsinin yüksəlməsinə və monositlərdə hüceyrədaxili fosforlaşmanın güclənməsinə səbəb olur. Bu, zidovudin effektlərinin artmasına gətirib çıxarır.

Hamiləlik və laktasiya dövründə istifadəsi

Preparatın dölün inkişafına və fertilliyə təsiri ilə əlaqəli nəzarət olunan klinik tədqiqatlar aparılmayıb.
İnsanlarda inozinin ana südü ilə xaric olması məlum deyil.

Beləliklə, həkim tərəfindən preparatın faydasının potensial risklərdən üstün olması müəyyən edilən hallar istisna olmaqla, Qroprinosin-Rixter preparatını hamilə qadınlarda və körpələrini ana südü ilə qidalandıran qadınlarda istifadə etmək olmaz.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri

İnozin pranobeksin farmakodinamikasını nəzərə alaraq, Qroprinosin-Rixter şərbətinin nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri az ehtimal edilir.

İstifadə qaydası və dozası

Preparat, yalnız daxilə qəbul edilir.

Preparatın dozası pasiyentin bədən kütləsindən və xəstəliyin ağırlıq dərəcəsindən asılı olaraq müəyyən edilir. Sutkalıq doza sutkada bir neçə dəfə qəbul etmək üçün bərabər hissələrə bölünməlidir. Müalicənin davametmə müddəti, bir qayda olaraq, 5-14 gün təşkil edir. Preparatın qəbulunu simptomların təzahürü azaldıqdan sonra daha 1-2 gün ərzində davam etdirmək lazımdır. Qroprinosin-Rixter şərbətinin 1 ml-də 50 mq inozin pranobeks vardır.

3 yaşdan yuxarı uşaqlarda dozalanma rejimi

Preparatın məsləhət görülən sutkalıq dozası adətən, bədən çəkisinə görə 50 mq/kq təşkil edir ki, bu da, bədən çəkisinin hər 1 kq-na 3-4 qəbula bölünmüş 1 ml Qroprinosin-Rixter şərbətinə ekvivalentdir. Sutkalıq dozanın hesablanması üçün aşağıdakı cədvəldən istifadə etmək lazımdır:
 

Dozalanmanın düzgün aparılması üçün əlavə edilmiş ölçülü şkalalı şprisdən istifadə etmək lazımdır.
Uşaqlarda I və ya IIi növ sadə herpes virusunun törətdiyi dəri və selikli qişaların infeksiyaları

Preparatı sutkalıq 50 mq/kq-a hesabı ilə 3-4 dəfəlik qəbula bölünmüş dozada 10-14 gün müddətində (simptomlar aradan qalxana qədər) qəbul etmək lazımdır.

İmmunitetləri zəif olan şəxslərdə yuxarı tənəffüs yollarının residivləşən infeksiyalarının əlavə müalicəsi

Uşaqlar üçün preparatın sutkalıq dozası 21 gün ərzində bədən çəkisinə 3-4 dəfəlik qəbula bölünmüş 50 mq/kq təşkil edir (və ya 7-10 gün ərzində davam edən eyni intervallarla 3 kurs). İmmunçatışmazlıq vəziyyətlərinin korreksiyası zamanı müalicə kursunun müddəti 3-9 həftə təşkil edə bilər.

Yarımkəskin sklerozlaşan panensefalit

8-10 gün ərzində qəbul edilən preparatın sutkalıq dozası 6 dəfəlik qəbula bölünmüş (hər 4 saatdan bir) 50-100 mq/kq-a təşkil edir; yüngül gedişli proses zamanı 8 günlük fasilədən sonra əlavə 1-3 kurs, ağır gedişli xəstəlikdə isə 9 əlavə kurs təyin etmək olar.

3 yaşdan aşağı uşaqlarda istifadə etmək olmaz.

Yetkin yaşlı pasiyentlərdə, o cümlədən, yaşlı pasiyentlərdə dozalanma rejimi

Məsləhət görülən sutkalıq doza bədən çəkisinə 50 mq/kq (bədən çəkisinə sutkada 1 ml/1 kq) təşkil edir: bir qayda olaraq, 3 və ya 4 dəfəlik qəbula bölünmüş cəmi 3 q (sutkada 60 ml şərbət). Maksimal sutkalıq doza 4 q (sutkada 80 ml şərbət) təşkil edir.

Əlavə təsirləri

Böyüklərdə olduğu kimi uşaqlarda da preparatın istifadəsilə əlaqədar müntəzəm müşahidə olunan yeganə arzuolunmayan reaksiya qan zərdabında və sidikdə sidik turşusunun konsentrasiyasının yüksəlməsi (adətən, normal göstəricilər çərçivəsində) olmuşdur. Preparatı ləğv etdikdən sonra bir neçə gün sonra sidik turşusunun konsentrasiyası normalaşır.

Arzuolunmayan dərman reaksiyaları (ADR) MedDRa-nın sistem-orqan siniflərinə və başvermə tezliyinə müvafiq təsnif edilir: çox tez-tez (≥ 1/10), tez-tez (≥ 1/100-dən < 1/10-ə qədər), bəzən (≥ 1/1000-dən < 1/100-ə qədər), məlum deyil (əldə olunan məlumatlara əsasən inkişafetmə tezliyini qiymətləndirmək mümkün deyil).

Hər bir tezlik qrupu çərçivəsində ADR onun ciddiliyinin azalması sırasında sadalanmışdır.
Preparatı klinik tədqiqatlarda 3 aya qədər və daha artıq müddət ərzində istifadə etdikdə, qeydə alınmış arzuolunmayan reaksiyalar

Psixikada baş verən pozğunluqlar: bəzən – əsəbilik.

Sinir sistemində baş verən pozğunluqlar: tez-tez – başağrı, başgicəllənmə; bəzən – yuxululuq və ya yuxusuzluq.
Mədə-bağırsaq sistemində baş verən pozğunluqlar: tez-tez – qusma ilə və onsuz ürəkbulanma, epiqastral nahiyədə ağrı; bəzən – diareya, qəbizlik.

Dəridə və dərialtı toxumalarda baş verən pozğunluqlar: tez-tez – qaşınma, səpgi.

Böyrəklərdə və sidikçıxarıcı yollarda baş verən pozğunluqlar: bəzən – poliuriya (sidiyin həcminin artması).
Skelet-əzələ sistemində və birləşdirici toxumada baş verən pozğunluqlar: tez-tez – artralgiya.

Ümumi və yeridilmə nahiyəsində baş verən pozuntular: tez-tez – yorğunluq, süstlük.
Laborator və instrumental məlumatlar: tez-tez – qanda transaminazaların, qələvi fosfatazanın miqdarının yüksəlməsi, qanda sidik cövhərinin miqdarının artması.

Qeydiyyatdan sonrakı dövrdə qeydə alınmış arzuolunmayan reaksiyalar

Mədə-bağırsaq sistemində baş verən pozğunluqlar: məlum deyil – epiqastral nahiyədə ağrı.
İmmun sistemdə baş verən pozğunluqlar: məlum deyil – angionevrotik ödem, hiperhəssaslıq reaksiyaları, övrə, anafilaktik reaksiyalar, anafilaktik şok.

Sinir sistemində baş verən pozğunluqlar: məlum deyil – başgicəllənmə.

Dəridə və dərialtı toxumalarda baş verən pozğunluqlar: məlum deyil – eritema.

Ehtimal edilən əlavə reaksiyalar barədə məlumatın verilməsi

Preparatın qeydiyyatdan sonrakı dövründə inkişaf etməsi ehtimal edilən arzuolunmayan reaksiyalar barədə məlumat vermək vacibdir. Bu, preparatın fayda/risk nisbətinin monitorinqini davam etdirməyə imkanı verir. Tibb işçiləri istənilən ehtimal edilən bütün arzuolunmayan reaksiyalar barədə milli hesabat sistemi vasitəsi ilə məlumat verməlidirlər.

Doza həddinin aşılması

Qroprinosin-Rixter şərbətindən istifadə etdikdə, doza həddinin aşılması halları barədə heç bir məlumat yoxdur. Heyvanlar üzərində preparatın toksikliyinin öyrənilməsi istiqamətində aparılan tədqiqatların nəticələrini nəzərə alaraq, qan zərdabında sidik turşusunun konsentrasiyasının əhəmiyyətli dərəcədə yüksəlməsini istisna etməklə, ciddi əlavə effektlərin inkişaf etmə ehtimalı azdır.
Doza həddinin aşılması zamanı müalicə simtomatik və dəstəkləyici olmalıdır.

Buraxılış forması

250 mq/5 ml şərbət.

Qoruyucu qurğu və sıxlaşdırıcı tıxacla təchiz olunmuş polietilen burulan qapaqlı həcmi 150 ml olan tünd şüşə flakon. 1 flakon, 0,5 ml-dən 5 ml-ə qədər dərəcələnmiş plastik şprislə komplektdə, içlik vərəqə ilə birlikdə karton qutuya qablaşdırılır.

Saxlanma şəraiti

25°C-dən temperaturdan yüksək olmayan və uşaqların əli çatmayan yerdə saxlamaq lazımdır. Soyutmaq və dondurmaq olmaz.

Yararlılıq müddəti

2 il.

Flakon ilk dəfə açıldıqdan sonra preparatın yararlılıq müddəti 6 aydır.

Yararlılıq müddəti bitdikdən sonra istifadə etmək olmaz.

Aptekdən buraxılma şərti

Resept əsasında buraxılır.

İstehsalçı

“Gedeon Richter Rumıniya” S.C. Tırqu-Mureş, Rumıniya.

Keyfiyyətə nəzarət

“Gedeon Richter Polşa” MMC, Qrodzisk Mazovetskiy, Polşa.

Qeydiyyat vəsiqəsinin sahibi

“Gedeon Richter” ASC, Budapeşt, Macarıstan.

İstehsalçının və ərizəçinin maraqlarını təmsil edən şirkət

“Gedeon Richter” ASC

1103 Budapeşt, Demrei küç., 19-21, Macarıstan.

Qaynar xətt telefonu (zəng ödənişsizdir): 7-800-555-00777.

Elektron ünvan: [email protected]

Groprinosin Rixter nə üçündür?

1. Virus infeksiyası əleyhinə vasitələr
2. İmmunçatışmazlığı zamanı istifadə olunan vasitələr

Qeyd: Hər hansı bir əlavə və ya dərmanı qəbul etməzdən əvvəl həkimlə məsləhətləşmək vacibdir. Həkim, sizin üçün ən uyğun müalicə metodunu təyin edə bilər və əlavə qəbulunun sizin sağlamlığınıza necə təsir edəcəyini dəyərləndirə bilər.