Etodin fort

Etodin fort haqqında məlumat

Etodin fort qiyməti

Etodin fort qiyməti və digər dərmanların qiymətləri müxtəlif amillərə bağlı olaraq dəyişkənlik göstərə bilər. İstehsalçı şirkət, tədarük zənciri və əczaçılıq bazarının dinamikləri bu qiymətlərin formalaşmasında mühüm rol oynayır. Bu yazı yazılan tarixdə Etodin fort qiyməti 4 azn - 6 azn arasında dəyişir.  

Ən gözəli budur ki, Doktorm.az  Platforması  ilə əməkdaşlıq edən Apteklər -dən bu günə olan Etodin fort qiyməti -ni öyrənərək əldə edəsiniz.

Etodin fort tərkibi

Təsiredici maddə: 1 örtüklü tabletin tərkibində 400 mq etodolak vardır.
Köməkçi maddələr: susuz laktoza, mikrokristallik sellüloza PH 200, natrium kroskarmelloza (Ac-di-sol), susuz kolloidal silisium (Aerosil 200), maqnezium stearat, Povidon (PVP K30, polivinilpirrolidon).
Örtük: № 43 Opadry II çəhrayı (85F240035) (qismən hidrolizə olunmuş polivinil spirti (E1203), titan dioksid (E171), makroqol/PEQ (E1521), talk (E553b), qırmızı dəmir oksidi (E172)).

Təsviri

Uzunsov, bir üzü kəsik, digər üzündə Nobel yazısı həkk olunmuş solğun çəhrayı rəngli örtüklü tabletlərdir.

Farmakoterapevtik qrupu

Qeyri-steroid, iltihab- və revmatizməleyhinə vasitə, sirkə turşusunun törəmələri və əlaqəli substansiyalar.
ATC kod: M01AB08.

Farmakoloji xüsusiyyətləri

Etodin fort nə üçündür?

Farmakodinamikası

Təsir mexanizmi
Etodolak indol törəməsidir, qeyri-steroid iltihabəleyhinə preparat (QSİƏP) olub iltihabəleyhinə, analgetik və antipiretik (qızdırmasalıcı) təsirə malikdir. Belə fərz edilir ki, təsir mexanizmi prostaqlandin sintezində iştirak edən siklooksigenaza fermentini blokadaya almasına əsaslanır.
Prostaqlandin sintezinin blokadası və SOG-2 selektivlik
Bütün QSİƏP-lərin prostaqlandin sintezini blokada etdiyi müşahidə edilmişdir. Onların müalicəvi effekti, həmçinin bəzi əlavə təsirləri bununla əlaqədardır. Etodolakla müşahidə edilən prostaqlandin sintezinin blokadası digər QSİƏP-lərdən fərqlənir. Heyvan modellərində iltihabəleyhinə dozada mədənin selikli qişasında sitoprotektiv prostaqlandin E konsentrasiyasının daha qısa müddətə və az dərəcədə azaldığı müşahidə edilmişdir. Bu fakt etodolakın siklooksigenaza-1-ə (sitoprotektiv) nisbətən siklooksigenaza-2-yə (iltihab SOG-2 sintezi ilə əlaqəlidir) selektivlik göstərdiyini aşkar edən müvafiq in vitro tədqiqatlara uyğun gəlir.
Bundan başqa, insan hüceyrəsi modelində tədqiqatlar etodolakın SOG-2-nin blokadası üçün selektiv olduğunu təsdiqlədi.
İltihabəleyhinə təsiri
Tədqiqatlar etodolakın bir çox QSİƏP-lərdən daha güclü iltihabəleyhinə təsirə malik olduğunu göstərmişdir.
Əlavə olaraq, etodolak, həmçinin urikozurik təsirə malikdir.
Farmakokinetikası
Sorulması
Etodolak peroral qəbul edildikdə yaxşı sorulur. 200 mq və ya 300 mq etodolakı peroral qəbul etdikdən 1-2 saat sonra müvafiq olaraq, 10-18 mkq/ml və 36 mkq/ml maksimum plazma konsentrasiyası yaranır. Terapevtik dozada təkrar təyinatdan sonra etodolakın plazma  konsentrasiyası birdəfəlik doza konsentrasiyasına görə az yüksəlir. Etodolak yeməklə və ya antasidlərlə birgə təyin edilə bilər, çünki, yemək və antasidlər onun sorulmasına təsir göstərmir.
Paylanması
Etodolakın plazma zülalları ilə birləşməsi 99 %-dən çoxdur.
Etodolak artritli xəstələrdə peroral qəbuldan sürətlə sinovial mayeyə nüfuz edir. Sinovial mayedə plazmaya nisbətən ümumi protein və albumin səviyyəsinin az olmasına müvafiq olaraq, sinovial mayedəki sərbəst etodolakın AUC göstəricisi (0-24 saatda) 72 % olub plazmadakından yüksəkdir. Paylanmadan sonrakı fazada sinovial mayedə ümumi və sərbəst etodolakın konsentrasiyası plazmadakından yüksəkdir; dozanın qəbulundan 8 və 32 saat sonra plazma səviyyəsi müvafiq olaraq 1,18 və 3,25-dir.
Metabolizmi
Etodolak qaraciyərdə geniş şəkildə metabolizmə uğrayır. Təyin olunan dozanın təqribən 72 %-i qeyri-aktiv metabolitlər şəklində sidiklə xaric olunur.
Ekskresiyası
Dozanın 16 %-i nəcislə xaric olur. Etodolakın plazma yarımparçalanma dövrü 6-7,4 saatdır.
Xüsusi qrup xəstələr
Böyrək çatışmazlığı
Yüngül və ya orta ağırlıqlı böyrək çatışmazlığı olan xəstələrdə sağlam insanlarla müqayisədə farmakokinetik dəyişikliklər müşahidə olunmamışdır. 4-həftəlik müalicədən sonra terapevtik dozada qəbul olunan etodolak sidik turşusunun plazma səviyyəsini 1-2 mq/dl azaltmışdır.
Qaraciyər çatışmazlığı
Etodolakın klirensi qaraciyər funksiyalarından asılı olduğu üçün qaraciyər funksiyalarının pozulmaları olan xəstələrdə etodolak klirensi aşağı ola bilər. 

İstifadəsinə göstərişlər

• Etodin FORT örtüklü tabletlər aşağıdakı hallarda istifadə olunur:
• osteoartrit, revmatoid artrit, ankilozlaşdırıcı spondilit kimi simptom və əlamətlərin kəskin və uzunmüddətli müalicəsi;
• kəskin və xroniki ağrının müxtəlif növlərinin müalicəsi.

Etodin fort əks göstərişlər

• Etodin® FORT etodolaka və ya tərkibindəki hər hansı komponentə qarşı yüksək həssaslığı olan xəstələrə əks göstərişdir.
• Aktiv və ya əvvəllər mövcud olmuş mədə yarası/qanaxması (yaranın və ya qanaxmanın iki və daha çox sübut edilmiş aydın əlaməti).
• İbuprofen, aspirin və ya digər QSİƏP-lərə qarşı yüksək həssaslıq reaksiyaları (astma, rinit, angionevrotik ödem və övrə) olan xəstələrə QSİƏP-lər əks göstərişdir.
• Anamnezində QSİƏP-lərlə müalicə ilə əlaqədar mədə-bağırsaq qanaxması və perforasiyası (deşilməsi) olan xəstələrə əks göstərişdir.
• Etodin® FORT ciddi ürək, qaraciyər və böyrək çatışmazlığı olan xəstələrdə istifadə edilməməlidir.
• Hamiləliyin sonuncu trimestrində istifadəsi əks göstərişdir.

Hamiləlik və laktasiya dövründə istifadəsi

Hamiləlik

İnsanlarda QSİƏP-lərin təyini ilə bağlı anadangəlmə qüsurlar qeydə alınmışdır, lakin, bunların baş vermə tezliyi çox aşağıdır və nəzərəçarpacaq dərəcədə deyil. QSİƏP-lərin ürək-damar sisteminə təsiri (arterial axacağın-ductus arteriosusun qapanması riski) məlum olduğu üçün hamiləliyin son trimestrində istifadəsi əks göstərişdir. QSİƏP qəbulu doğuşun gecikməsinə səbəb ola bilər və doğuş prosesində həm ana, həm uşaq tərəfindən qanaxma riskini yüksəldə bilər.
QSİƏP-lərin xəstə hamilələr üçün potensial faydası döl üçün yaratdığı riskdən daha yüksək olmadığı halda hamiləliyin ilk iki trimestrində və doğuş zamanı istifadə olunmamalıdır.
Laktasiya
Məhdud sayda tədqiqatların nəticələrinə əsasən QSİƏP-lər çox aşağı konsentrasiyalarda ana südündə tapılır. Etodolakın laktasiya zamanı təhlükəsizliyi öyrənilməmişdir. Etodin® FORT qəbulu zamanı ananın körpəni ana südü ilə qidalandırmasından qaçmaq lazımdır.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri

Etodolak başgicəllənmə, yuxululuq, yorğunluq və görmə pozulmalarına (qeyri-normal görmə) səbəb ola bilər. Xəstələr avtomobil və ya digər potensial təhlükəli mexanizmləri istifadə etməzdən əvvəl bu dərmanın onlara necə təsir etməsindən xəbərdar olmalıdırlar. Əgər yuxarıda göstərilən hallara səbəb olursa, avtomobil və digər potensial təhlükəli mexanizmləri idarə etməməlidirlər.

Etodin fort istifadə qaydası və dozası

Peroral qəbul üçündür. Qida ilə və ya yeməkdən sonra qəbulu tövsiyə olunur.
Simptomlara nəzarət üçün ən qısa müddət ərzində tələb olunan ən aşağı effektiv doza istifadə etməklə, arzuоlunmaz təsirləri minimuma endirmək mümkündür.
Analgeziya
Kəskin ağrı zamanı Etodin® FORT üçün tövsiyə olunan ümumi gündəlik doza 1000 mq-a qədərdir, 200-400 mq hər 6-8 saatdan bir istifadə olunmalıdır. 1000 mq/gün-dən artıq dozalar nəzarətli adekvat klinik tədqiqatlarda qiymətləndirilməmişdir.
Osteoartrit və revmatoid artrit
Osteoartrit və revmatoid artritin əlamət və simptomlarının müalicəsində Etodin® FORT-un tövsiyyə olunan başlanğıc dozası: 400 mq, gündə iki dəfə. Uzunmüddətli müalicə zamanı 600 mq/gün-dən aşağı doza kifayət edə bilər. Həkimlər, 1000 mq/gün-dən artıq dozaların nəzarətli adekvat klinik tədqiqatlarda qiymətləndirilmədiyi haqqında məlumatlandırılmalıdırlar.
Xronik hallarda Etodin® FORT ilə müalicə zamanı müalicənin artıq birinci həftəsində, bir çox hallarda ikinci həftə ərzində terapevtik cavab almaq mümkündür. Müalicəyə qənaətbəxş cavab alındıqdan sonra xəstənin qəbul etdiyi dozaya yenidən baxılmalı və korreksiya edilməlidir.
Xüsusi qrup xəstələr

Pediatrik xəstələr
Etodin® FORT-un uşaqlarda istifadəsi məsləhət görülmür.
Yaşlı xəstələr
Yaşlı xəstələrdə ilkin doza korreksiyasına ehtiyac yoxdur.
Yaşlı xəstələrdə əlavə təsir nəticələrinin yaranma təhlükəsi daha yüksəkdir. QSİƏP qəbulu zəruridirsə, ən aşağı doza və mümkün qədər qısamüddətli müalicə kursu istifadə olunmalıdır.
Qastrointestinal qanaxma təhlükəsi olduğu üçün QSİƏP-lə müalicə olunan xəstə müntəzəm olaraq nəzarət altında olmalıdır. 

Doza həddinin aşılması

Simptomlar
Simptomlara baş ağrısı, ürəkbulanma, qusma, epiqastral nahiyədə ağrılar, mədə-bağırsaq qanaxmaları, nadir hallarda ishal, dezorientasiya (müvazinətin itməsi), oyanıqlıq, koma, yuxululuq, başgicəllənmə, qulaqlarda küy, huşun itməsi, bəzən qıcolmalar aiddir. Ağır zəhərlənmə hallarında kəskin böyrək çatışmazlığı və qaraciyərin zədələnməsi mümkündür.
Müalicə
Xəstələr simptomatik müalicə olunmalıdır. Toksiki dozanın alınmasından sonra ilk bir saat ərzində aktivləşdirilmiş kömür verilməsi mümkündür. Doza həddinin aşılmasından sonra mədə ilk bir saat ərzində yuyulmalıdır.
Yaxşı sidik ifrazı təmin olunmalıdır. Böyrək və qaraciyər funksiyaları nəzarət altında olmalıdır.
Potensial toksiki doza qəbulundan sonra xəstələr ən azı dörd saat ərzində nəzarət altında olmalıdırlar.
Tez-tez baş verən və ya uzunmüddətli qıcolmalardan qorunmaq üçün venadaxili diazepam vurulmalıdır. Xəstənin vəziyyətinə görə digər tədbirlər həyata keçirilə bilər. 

Buraxılış forması

1. Etodin FORT 2 örtüklü tablet blisterdə: 1 blister (2 tablet) içlik vərəqə ilə birlikdə karton qutuya qablaşdırılır.
2. Etodin FORT 7 örtüklü tablet blisterdə: 1 blister (7 tablet) içlik vərəqə ilə birlikdə karton qutuya qablaşdırılır.
3. Etodin FORT 14 örtüklü tablet blisterdə: 1 blister (14 tablet) içlik vərəqə ilə birlikdə karton qutuya qablaşdırılır.
4. Etodin FORT 28 örtüklü tablet blisterdə: 2 blister (14 tablet) içlik vərəqə ilə birlikdə karton qutuya qablaşdırılır.

Saxlanma şəraiti

25 °C-dən aşağı temperaturda, orijinal qutusunda və uşaqların əli çatmayan yerdə saxlamaq lazımdır.

Yararlılıq müddəti

4 il. Yararlılıq müddəti bitdikdən sonra istifadə etmək olmaz.

Aptekdən buraxılma şərti

Resept əsasında buraxılır.

İstehsalçı

NOBEL İLAÇ SANAYİİ VE TİCARET A.Ş.

Aid olduğu kateqoriyalar

1. Travmatik ağrılarda istifadə olunan vasitələr
2. Oynaq və əzələ ağrılarında istifadə olunan vasitələr