Abizol 15 mq

Beynəlxalq patentləşdirilməmiş adı: Aripiprazole

Abizol 15 mq qiyməti

Abizol 15 mq qiyməti və digər dərmanların qiymətləri müxtəlif amillərə bağlı olaraq dəyişkənlik göstərə bilər. İstehsalçı şirkət, tədarük zənciri və əczaçılıq bazarının dinamikləri bu qiymətlərin formalaşmasında mühüm rol oynayır. Bu yazı yazılan tarixdə Abizol 15 mq qiyməti 44 azn - 48 azn arasında dəyişir. 

Ən gözəli budur ki, Doktorm.az  Platforması  ilə əməkdaşlıq edən Apteklər -dən bu günə olan Abizol 15 mq qiyməti -ni öyrənərək əldə edəsiniz.

Abizol 15 mq tərkibi

Təsiredici maddə: 1 tabletin tərkibində 5 mq, 10 mq və ya 15 mq aripiprazol vardır.
Köməkçi maddələr: mannitol, krospovidon (Poliplasdon XL 10), krospovidon (Kollidon CL-F), povidon (PVP K-30), maqnezium stearat, FD&C Blue 2 (indiqokarmin lak) (E132) (Abizol® 5 mq), qırmızı dəmir oksidi (E172) (Abizol® 10 mq), sarı dəmir oksidi (E172) (Abizol® 15 mq).

Təsviri

• Abizol 5 mq mavi rəngli, düzbucaq formalı, bir tərəfində «5» rəqəmi həkk olunmuş, digər tərəfi kəsik tabletlərdir.
• Abizol 10 mq çəhrayi rəngli, düzbucaq formalı, bir tərəfində «10» rəqəmi həkk olunmuş tabletlərdir.
• Abizol 15 mq sarı rəngli, dəyirmi formalı, bir tərəfində «15» rəqəmi həkk olunmuş tabletlərdir.

Farmakoterapevtik qrupu

Digər antipsixotik vasitələr.

ATC kodu: N05AX12.

Farmakoloji xüsusiyyətləri

Abizol 15 mq nə üçündür?

Farmakodinamikası
Belə güman edilir ki, aripiprazolun şizofreniya və bipolyar pozulmalar zamanı effektivliyi dofamin D2 və serotonin 5HT1a reseptorlarına qarşı qismən aqonizmi və serotonin 5HT2a reseptorlarına qarşı antaqonizmi sayəsində baş verir. Aripiprazol heyvan modellərində dofaminergik hiperaktivlik zamanı antaqonist, dofaminergik hipoaktivlik zamanı isə aqonist təsir göstərir. Aripiprazol in vitro tədqiqatlar zamanı dofamin D2 və D3, serotonin 5HT1a və 5HT2a reseptorlarına qarşı yüksək affinlik, dofamin D4, serotonin 5HT2c və 5HT7, alfa-1 adrenergik və histamin H1 reseptorlarına qarşı isə orta affinlik nümayiş etdirir. Aripiprazol, həmçinin,
serotoninin geriyə tutulma sahəsi reseptorlarına qarşı orta affinlik nümayiş etdirir, muskarin reseptorlarına qarşı affinliyi isə əhəmiyyətli deyildir. Dofamin və serotonindən başqa digər reseptorlarla qarşılıqlı təsiri aripiprazolun digər klinik effektlərini izah edə bilər.

Farmakokinetikası
Sorulması
Aripiprazol yaxşı sorulur, yüksək plazma konsentrasiyası dozanın qəbulundan sonrakı 3-5 saat ərzində əldə edilir. Aripiprazol minimal olaraq pre-sistem metabolizmə məruz qalır. Tabletin peroral qəbulu zamanı mütləq biomənimsənilməsi 87 % təşkil edir. Yüksək yağlı qidalar aripiprazolun biomənimsənilməsinə təsir etmir.
Paylanması
Aripiprazol güclü ekstravaskulyar (damarxarici) paylanma da daxil olmaqla, 4,9 l/kq paylanma həcmi ilə bədəndə geniş şəkildə paylanır. Terapevtik konsentrasiyalarda aripiprazol və dehidroaripiprazolun 99 %-dən çox hissəsi, əsasən albumin olmaqla, plazma proteinləri ilə birləşir.
Metabolizm
Aripiprazol qaraciyərdə 3 biotransformasiya yolu ilə metabolizə olunur: dehidrogenləşmə, hidroksilləşmə, N-dealkilləşmə. In vitro tədqiqatlara əsasən aripiprazolun dehidrogenləşməsi və hidroksilləşməsi CYP3A4 və CYP2D6 fermentləri vasitəsi ilə, N-dealkilləşməsi isə CYP3A4  vasitəsilə katalizə edilir. Sistem sirkulyasiyasında əsas yeri aripiprazol tutur. Dehidroaripiprazol aktiv metabolit olub plazmada aripiprazolun AUC göstəricisinin 40 %-ni təşkil edir.
Eliminasiyası
Aripiprazolun yarımparçalanması CYP2D6-ın güclü funksiyası zamanı təqribən 75 saat, zəif funksiyası zamanı isə təqribən 146 saatdır.
[14C]-nişanlanmış aripiprazolun birdəfəlik qəbulu zamanı təqribən 27 %-i sidikdə, 60 %-i nəcisdə tapılmışdır. Dəyişilməmiş aripiprazolun 1 %-dən az hissəsi sidiklə və 18 %-i nəcislə xaric olmuşdur.
Aripiprazolun tez-tez bədən klirensi 0,7 ml/dəq/kq-dır, başlıca olaraq qaraciyər vasitəsilə baş verir.

İstifadəsinə göstərişlər

Abizol böyüklərdə, 15 yaş və 15 yaşdan yuxarı yeniyetmələrdə şizofreniyanın müalicəsi üçün təyin edilir.
Abizol bipolyar pozulmaları olan xəstələrdə orta və ağır dərəcəli maniakal epizodlarınmüalicəsində və əvvəlcədən maniakal epizodlar müşahidə olunan və aripiprazol ilə aparılmış müalicəyə cavab vermiş xəstələrdə yeni epizodların qarşısını almaq üçün təyin edilir.

Abizol 15 mq əks göstərişlər

Aktiv maddə olan aripiprazola və ya tabletin tərkibindəki hər hansı köməkçi maddəyə qarşı yüksək həssaslığı olan xəstələrə əks göstərişdir.

Xüsusi göstərişlər və ehtiyyat tədbirləri

Antipsixotik müalicə zamanı xəstənin vəziyyətinin yaxşılaşması bir neçə gündən bir neçə həftəyə qədər çəkə bilər. Bu period müddətində xəstələr diqqətli nəzarət altında olmalıdır. İntihara cəhd davranışları və əhval-ruhiyyə pozulmaları psixi xəstəliklər üçün xarakterik hallardır və bəzi xəstələrdə belə hallar təyinata başlayanda və ya dayandırdıqdan dərhal sonra, aripiprazol ilə aparılmış terapiya daxil olmaqla qeydə alınmışdır. Yüksək risk qrupuna daxil xəstələrə antipsixotik müalicə dövründə yaxından nəzarət edilməlidir. Epidemioloji tədqiqatların nəticələri göstərir ki, şizofreniya və bipolyar pozulması olan xəstələrdə aripiprazolla müalicə zamanı, digər antipsixotik dərmanlarla müqayisədə, intihara meyl hallarında artım müşahidə edilməmişdir.

Ürək-damar xəstəlikləri
Bilinən ürək-damar pozulmaları (miokard infarktı və ya ürəyin işemik xəstəliyi, ürək çatışmazlığı, keçiricilik pozulması), serebrovaskulyar pozulmaları olan xəstələrdə, hipotoniyaya (dehidratasiya, hipovolemiya və antihipertonik dərmanlarla müalicə) və ya hipertoniyaya (sürətli və bədxassəli hipertoniya daxil olmaqla) səbəb ola biləcək vəziyyətlərdə aripiprazol ehtiyatla istifadə edilməlidir.
Antipsixotik dərmanlarla müalicə zamanı venoz trombemboliya (VTE) halları qeydə alınmışdır.
Antipsixotik müalicə alan xəstələr çox vaxt VTE üçün risk qrupuna daxil olduğundan, müalicədən əvvəl və Abizol® ilə müalicə dövründə bütün mümkün olan VTE risk faktorları təyin edilməli və qarşısını almaq üçün tədbirlər görülməlidir.

Keçiricilik pozulması
Klinik tədqiqatlar zamanı, aripiprazol müalicəsi alan xəstələrdə plasebo ilə müqayisə olunan QT intervalının uzanması qeydə alınmışdır. Digər antipsixotiklərlə olduğu kimi, aripiprazol ailəsində QT intervalının uzanması halları olan xəstələrə ehtiyatla təyin edilməlidir.

Gecikmiş diskineziya
1 il və daha az müddətli klinik sınaqlar zamanı bəzi hallarda aripiprazolla müalicə ilə bağlı diskineziya halları qeydə alınmışdır. Abizol® ilə müalicə olunan xəstələrdə gecikmiş diskineziyanın əlamət və simptomları meydana çıxırsa, doza azaldılmalı və ya müalicə tamamilə dayandırılmalıdır. Müalicə dayandırıldıqdan sonra bu simptomlar müvəqqəti olaraq pisləşə bilər.
Bədxassəli neyroleptik sindrom (BNS)
BNS, antipsixotik dərman vasitələri ilə bağlı olan potensial həyat üçün təhlükəli haldır. Kliniktədqiqatlarda aripiprazol ilə müalicə zamanı BNS baş verdiyi az hallarda qeydə alınmışdır. 

Tutmalar (qıcolmalar)
Klinik sınaqlara əsasən aripiprazolla müalicə alan xəstələrdə az hallarda tutmaların baş verdiyi qeydə alınmışdır. Anamnezində tutmalar və ya tutmalara səbəb ola biləcək vəziyyətləri olan xəstələrdə ehtiyatla istifadə edilməlidir.
Demensiyaya bağlı psixozu olan yaşlılar
Digər yeni nəsil (atipik) antipsixotik dərmanlarda olduğu kimi bu preparat da demensiyalı yaşlı xəstələrin psixozlarında istifadə etdikdə, serebrovaskulyar pozulmalar, infeksiyalar, ürək çatışmazlığı səbəbindən qəfil ölüm hadisələri riskinin yüksəlməsinə səbəb ola bilər.

Serebrovaskulyar əlavə reaksiyalar
Eyni tədqiqat zamanı xəstələrdə ölüm halı da daxil olmaqla serebrovaskulyar əlavə reaksiyalar (insult, müvəqqəti işemik atak) qeydə alınmışdır (orta yaş 84, yaş həddi 78-88). Belə hallar aripiprazol müalicəsi alanların 1,3 %-də, plasebo qəbul edənlərin isə 0,6 %-də rast gəlinmişdir. Bu fərq statistik əhəmiyyətli olmasa da, bu tədqiqatlardan sabit doza ilə aparılan kliniki sınaqların birində serebrovaskulyar əlavə reaksiyaların dozalanmadan əhəmiyyətli dərəcədə asılı olduğu müəyyən edilmişdir. Aripiprazol demensiya ilə bağlı psixozlarda təyin edilmir.

Hiperqlikemiya və şəkərli diabet
Aripiprazol daxil olmaqla, antipsixotik dərmanlarla müalicə alan xəstələrdə hiperqlikemiya, bəzi hallarda, şiddətli olaraq ketoasidoz, hiperosmotik koma və ya ölümlə əlaqəli şəkildə qeydə alınmışdır. Belə ciddi ağırlaşmalar üçün risk faktoru piylənmə, ailə anamnezində diabetin olmasıdır. Klinik tədqiqatlar zamanı aripiprazol qəbul edənlərdə hiperqlikemiya ilə bağlı əlavə reaksiyalar (diabet daxil olmaqla) və ya laboratoriyanın qeyri-normal qlikemiya göstəriciləri plasebo ilə müqayisədə əhəmiyyətli dərəcədə fərqli olmamışdır. Aripiprazol və digər atipik antipsixotik dərmanlarla müalicə qəbul edən xəstələrdə hiperqlikemiya ilə əlaqəli əlavə reaksiyaların baş verməsini birbaşa müqayisə edən dəqiq qiymətləndirmə yoxdur. Abizol® daxil olmaqla istənilən antipsixotik dərmanla müalicə alan xəstələr hiperqlikemiyanın əlamət və simptomlarına (polidipsiya, poliuriya, polifagiya və zəiflik kimi) görə müşahidə edilməlidir və şəkərli diabeti olan və ya şəkərli diabet üçün risk faktoru olan xəstələr müntəzəm nəzarət edilməlidir.

Yüksək həssaslıq
Digər dərman vasitələri ilə olduğu kimi aripiprazola qarşı da allergiya kimi yüksək həssaslıq reaksiyaları baş verə bilər.
Artıq bədən kütləsi
Antipsixotik dərmanlardan istifadə və hərəkətsiz həyat tərzi ilə əlaqədar kütlə artımı şizofreniya və bipolyar maniya xəstələrində tez-tez rast gəlinən haldır və ciddi ağırlaşmalara səbəb ola bilər.
Bədən kütləsinin artması post-marketinq dövründə aripiprazol təyin edilmiş xəstələrdə qeydə alınmışdır. Bu adətən, anamnezində diabet, tireoid pozulması və ya hipofizar adenoma kimi risk faktorları olan xəstələrdə rast gəlinmişdir. Tədqiqatlar zamanı aripiprazolun klinik əhəmiyyətli kütlə artımına səbəb olduğu müşahidə edilməmişdir.
Disfagiya
Digər antipsixotiklərlə olduğu kimi aripiprazolla da əlaqəli həzm yollarının hərəki fəaliyyətinin pozulması və aspirasiya baş verir. Aspirasion pnevmoniyası olan xəstələrdə aripiprazol və digər antipsixotik dərmanlar ehtiyatla istifadə edilməlidir.

Digər dərman vasitələri ilə qarşılıqlı təsiri

α1-adrenergik reseptorlara qarşı antaqonizmliyi ilə əlaqədar antihipertonik vasitələrin təsirini artırır.
Aripiprazolun MSS-ə təsirini nəzərə alaraq, əlavə reaksiya olaraq sedasiya törədən alkoqol və digər dərman vasitələri ilə birlikdə istifadəsi zamanı ehtiyatlı olmaq lazımdır.
Əgər aripiprazol QT intervalını uzadan və ya elektrolit disbalans yaradan dərmanlarla birgə təyin edilirsə, ehtiyatlı olmaq lazımdır

Abizol-un digər dərmanlara təsiri

Klinik tədqiqatlar zamanı, 10-30 mq/gün dozada aripiprazol təyini CYP2D6 (dekstrometorfan/3-metoksimorfinan nisbəti), 2C9 (varfarin), 2C19 (omeprazol) və 3A4
(dekstrometorfan) izofermentləri vasitəsilə metabolizə olunan substansiyalara əhəmiyyətli effekt göstərməmişdir. Əlavə olaraq, in vitro tədqiqatlarda aripiprazol və dehidro-aripiprazol CYP1A2 ilə əlaqəli metabolizmə dəyişdirici təsir etmir. Bu izofermentlə metabolizmə uğrayan dərman vasitələri ilə klinik əhəmiyyətli qarşılıqlı təsiri ehtimal edilmir.
Aripiprazol valproat, litium və ya lamotricinlə birgə təyin edildikdə, valproat, litium və lamotricinin konsentrasiyasında klinik əhəmiyyətli dəyişiklik müşahidə edilməmişdir

Hamiləlik və laktasiya dövründə istifadəsi

Hamilə qadınlarda aripiprazol ilə müvafiq klinik tədqiqatlar aparılmamışdır. Anadangəlmə anomaliyalar qeydə alınsa da, bunun aripiprazol qəbulu səbəbindən olduğu müəyyən deyil.
Heyvanlar üzərində aparılan tədqiqatlar inkişaf üçün toksiklik potensialını istisna etmir. Xəstələr hamilə qalmaqları barədə və ya aripiprazolla müalicə dövründə hamilə qalmaq niyyətindədirlərsə, həkimə bildirməlidirlər. Hər halda, insanlar üçün təhlükəsizliyi haqda məlumat məhdud olduğundan və heyvanlarla aparılan tədqiqatların nəticələri narahatlıq yaratdığından aripiprazol, yalnız, hamilələrə göstərdiyi effekt, döl üçün yaratdığı riskdən daha önəmli olduğu hallarda istifadə edilə bilər.
Hamiləliyin 3-cü trimestri ərzində antipsixotik dərmanların (o cümlədən, aripiprazol) təsirinə məruz qalmış körpələr doğuşdan sonra, ağırlığına və davam etmə müddətinə görə müxtəlif olan ekstrapiramidal və/və ya “kəsmə” simptomları kimi əlavə reaksiyalara məruz qala bilərlər. Qeydə alınmışdır ki, belə körpələrdə oyanıqlıq, hipotoniya, hipertoniya, tremor, yuxululuq, respirator pozulma, qidalanma pozulması halları baş verir. Bu səbəbdən, belə körpələr diqqətli nəzarət altında saxlanılmalıdır.
Siçovullar üzərində aparılan tədqiqatlar zamanı, laktasiya dövründə aripiprazolun ana südünə ekskresiya olunduğu müşahidə edilmişdir. İnsan südünə ekskresiya olunması haqda məlumat yoxdur. Xəstələrə aripiprazol qəbulu zamanı uşaqlarını ana südü ilə qidalandırmamaq məsləhət görülməlidir. 

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri

Digər antipsixotik dərmanlarla olduğu kimi xəstələr, avtomobil və maşın idarəetmənin təhlükəli ola biləcəyi, aripiprazolun onlarda, buna yol açan əlavə təsirlər yaratmadığına əmin olmayana qədər, istifadə etməmələri haqqında xəbərdar edilməlidirlər.

Abizol 15 mq istifadə qaydası və dozası

Böyüklər
Şizofreniya
Məsləhət görülən başlanğıc doza 10 və ya 15 mq/gün, sonradan 15 mq/gün dozası saxlanılmaqla, gündə 1 dəfə, qidadan asılı olmayaraq. Abizol® 10-30 mq/gün doza həddində effektivdir. Gündəlik 15 mq-dan yüksək dozalarda effektivliyinin yüksəldiyi sübut edilməsə də, bəzi xəstələrdə yüksək dozada effektiv ola bilər.
Maksimum sutkalıq doza 30 mq-dan yüksək olmamalıdır.

Maniakal epizodlar
Monoterapiya və ya kompleks müalicə zamanı sutkalıq doza qida qəbulundan asılı olmayaraq 15 mq-dır. Bəzi xəstələr üçün yüksək doza effektiv ola bilər. Maksimum sutkalıq doza 30 mq-dan yüksək olmamalıdır.
Bipolyar pozulmalarda maniakal epizodların təkrarlanmasının qarşısını almaq üçün Maniakal epizodun monoterapiya və ya kompleks müalicəsi üçün aripiprazol qəbul etmiş xəstələrdə, təkrarlanmanın qarşısını almaq üçün müalicə eyni dozada davam etdirilir. Gündəlik dozanın uyğunlaşdırılması və ya azaldılması klinik göstəricilərə əsasən aparılır.

Uşaqlar və yeniyetmələr
15 yaş və 15 yaşdan yuxarı yeniyetmələrdə şizofreniya Abizol üçün məsləhət görülən doza 10 mq/gün, sutkada 1 dəfə, qida qəbulundan asılı olmayaraq. Müalicə 2 gün, gündə 2 mq (aripiprazolun peroral məhlul forması), sonrakı 2 gün, gündə 5 mq-la başlayıb, gündə 10 mq olmaqla davam etdirilməlidir. Əgər lazım olarsa, sonrakı doza artımı 5 mq olmaqla, sutkalıq doza 30 mq-dan artıq olmamaq şərtilə aparıla bilər.
Abizol 10-30 mq/gün doza həddində effektivdir. Gündəlik 10 mq-dan yüksək dozalarda yeniyetmələrdə effektivliyinin yüksəldiyi sübut edilməsə də, bəzi xəstələrdə yüksək dozada effektiv ola bilər.
Abizol-un 15 yaşdan kiçik uşaqlarda istifadəsi, effektivliyi və təhlükəsizliyi haqqında məlumatlar məhdud olduğu üçün, məsləhət görülmür.
Autizmlə əlaqəli əsəbilik
Abizol-un 18 yaşdan kiçik uşaqlarda və yeniyetmələrdə effektivliyi və təhlükəsizliyi hələ ki, öyrənilməmişdir

Xüsusi qrup xəstələr
Qaraciyər çatışmazlığı
Yüngül və orta ağırlıqlı qaraciyər çatışmazlığı olan xəstələrdə doza uyğunlaşdırılması tələb olunmur. Ciddi qaraciyər çatışmazlığı olan xəstələrə təsiri haqda məlumatlar məhduddur. Belə xəstələrdə dozalanma ehtiyatla aparılmalıdır və 30 mq/gün maksimum sutkalıq doza çox ehtiyatla təyin edilməlidir.
Böyrək çatışmazlığı
Böyrək çatışmazlığı olan xəstələrdə doza uyğunlaşdırması tələb olunmur.
Yaşlılar
65 və 65-dən yuxarı yaşlı, şizofreniya və bipolyar pozulması olan xəstələrdə aripiprazolun effektivliyi müəyyən edilməmişdir. Bu qrup əhalinin yüksək həssaslığını nəzərə alaraq və klinik faktorlar əsas verirsə, aşağı başlanğıc doza təyin edilməlidir.
Cins
Qadınlarda və kişilərdə cinsdən asılı olaraq doza uyğunlaşdırmasına ehtiyac yoxdur.
Siqaret çəkənlər
Aripiprazolun metabolizm yollarına əsasən, siqaret çəkənlərdə doza uyğunlaşdırmasına ehtiyac yoxdur. 

Əlavə təsirləri

Plasebo-nəzarət olunan tədqiqatlarda ən çox rast gələn əlavə reaksiyalar narahatlıq (akatiziya) və ürəkbulanma olmuşdur, hər ikisi aripiprazol qəbul edən xəstələrin 3 %-dən çoxunda rast gəlmişdir.
Aşağıda plaseboya nisbətən daha çox (≥ 1/100) rast gələn və ya tibbi cəhətdən mümkün ola bilən əlavə təsirlər göstərilmişdir (*).
Əlavə təsirlərin baş vermə tezliyi göstəricisi belədir: tez-tez (≥ 1/100) və bəzən (≥ 1/1000-dən< 1/100-ə).

• Psixiatrik pozulmalar
• Tez-tez: narahatlıq, yuxusuzluq, təşviş.
• Bəzən: depressiya*.
• Sinir sistemi pozulmaları
• Tez-tez: ekstrapiramidal pozulma, akatiziya, tremor, başgicəllənmə, yuxululuq, sedasiya, baş ağrısı.
• Göz xəstəlikləri
• Tez-tez: bulanıq görmə.
• Ürək xəstəlikləri
• Bəzən: taxikardiya*.
• Damar (vaskulyar) pozulmaları
• Bəzən: ortostatik hipotoniya*.
• Mədə-bağırsaq pozulmaları
• Tez-tez: dispepsiya, qusma, ürəkbulanma, qəbizlik, ağız suyu hipersekresiyası.
• Ümumi pozulmalar
• Tez-tez: yorğunluq.
• Ekstrapiramidal simptomlar (EPS)
• Şizofreniya - tədqiqatlar zamanı aripiprazol müalicəsi alan xəstələrdə parkinsonizm, akatiziya, distoniya və diskineziya daxil olmaqla EPS-ın baş verməsi (25,8 %), haloperidol müalicəsi alanlarla müqayisədə (57,3 %) xeyli aşağıdır. Plasebo-kontrollu tədqiqatda EPS-ın baş verməsi aripiprazol müalicəsi alanlarda 19 %, plasebo qəbul edənlərdə 13,1 % olmuşdur. Digər  tədqiqatda EPS-in baş verməsi aripiprazol müalicəsi alanlarda 14,8 %, olanzapin müalicəsi alanlarda isə 15,1 % olmuşdur.
• Bipolyar pozulmaları olan xəstələrdə maniakal epizodlar - tədqiqatda EPS-ın baş verməsi aripiprazol müalicəsi alanlarda 23,5 %, haloperidol müalicəsi alanlarda isə 53,3 % olmuşdur.
• Digər tədqiqatda EPS-ın baş verməsi aripiprazol müalicəsi alanlarda 26,6 %, litium müalicəsi alanlarda isə 17,6 % olmuşdur. Plasebo-kontrollu tədqiqatda
• EPS-ın baş verməsi aripiprazol müalicəsi alanlarda 18,2 %, plasebo qrupunda isə 15,7 % olmuşdur.
• Plasebo-kontrollu tədqiqatlar zamanı, bipolyar xəstələrdə akatiziyanın baş verməsi aripiprazol qrupu üçün 12,1 % və plasebo qrupu üçün 3,2 % olmuşdur.
• Şizofreniya xəstələrində isə akatiziyanın baş verməsi aripiprazol qrupu üçün 6,2 % və plasebo qrupu üçün 3,0 % olmuşdur.

DƏRMAN QƏBULU ZAMANI ARZUOLUNMAZ REAKSİYALAR YARANDIQDA HƏKİMİNİZLƏ MƏSLƏHƏTLƏŞİN!

Doza həddinin aşılması

Klinik tədqiqatlar və post-marketinq zamanı, təsadüfi və ya məqsədli olaraq aripiprazolun kəskin yüksək dozalanmasında 1260 mq-a qədər dozada ölüm halları müşahidə edilməmişdir. Tibbi əhəmiyyətli, letargiya, qan təzyiqinin yüksəlməsi, yuxululuq, taxikardiya, ürəkbulanma, qusma və diareya kimi simptom və əlamətlər müşahidə edilmişdir. Uşaqlarda təsadüfi yüksək dozalanma (195 mq-a qədər) ölüm halları ilə müşahidə edilməmişdir. Tibbi əhəmiyyətli simptom və əlamətlər kimi yuxululuq, şüurun müvəqqəti itməsi və ekstrapiramidal simptomlar qeydə alınmışdır.
Yüksək dozalanma zamanı simptomatik müalicə, hava axınının yaxşılaşdırılması, oksigenasiya və ventilyasiya tələb olunur. Başqa dərmanların da prosesə cəlb oluna biləcəyi nəzərə alınmalıdır. Bu səbəbdən dərhal kardiovaskulyar monitorinq aparılmalı, mümkün aritmiyaları qeydə almaq üçün fasiləsiz elektrokardioqramma izlənməlidir. Aripiprazolla yüksək dozalanmadan şübhələndikdə xəstə tibbi nəzarətə alınmalı və tam sağalana qədər nəzarət davam
etdirilməlidir.
Aripiprazol qəbulundan 1 saat sonra təyin edilən aktivləşdirilmiş kömür (50 q), aripiprazolun Cmax-nu 41 %, AUC göstəricisini 51 % azaltmışdır, buna görə yüksək dozalanma zamanı aktivləşdirilmiş kömür effektiv ola bilər.
Hemodializin aripiprazolla yüksək dozalanma zamanı effektiv olması haqda məlumat olmasa da, aripiprazol plazma proteinlərinə möhkəm birləşdiyindən hemodializin effektiv olacağı güman edilmir.

Buraxılış forması

• Abizol 5 mq . 14 tablet, Al - Al folqalı blisterdə. 2 blister (28 tablet) içlik vərəqə ilə birlikdə karton qutuya qablaşdırılır.
• Abizol 10 mq. 14 tablet, Al - Al folqalı blisterdə. 2 blister (28 tablet) içlik vərəqə ilə birlikdə karton qutuya qablaşdırılır.
• Abizol 15 mq. 14 tablet, Al - Al folqalı blisterdə. 2 blister (28 tablet) içlik vərəqə ilə birlikdə karton qutuya qablaşdırılır.

Saxlanma şəraiti

25 ˚C-dən aşağı temperaturda, orijinal qutusunda və uşaqların əli çatmayan yerdə saxlamaq lazımdır

Yararlılıq müddəti

3 il Yararlılıq müddəti bitdikdən sonra istifadə etmək olmaz.

Aptekdən buraxılma şərti

Resept əsasında buraxılır.

İstehsalçı

NOBEL İLAÇ SANAYİİ VE TİCARET A.Ş.
Sancaklar 81100 Düzce/Türkiye.

Lisenziya sahibi

NOBEL İLAÇ SANAYİİ VE TİCARET A.Ş.
Ümraniye 34768 İstanbul/Türkiye.