Yaz gəldi, yanında da depressiyası- DİQQƏTLİ OLUN!

Yazın gəlişi ilə onun yorğunluğu da insanın canına çökür. Səbəbsiz bir əsəbilik, haldan hala düşmə, daim yatmaq arzusu... Bunlarla, demək olar ki, hər yaz qarşılaşırıq.
Məsələni dəyərləndirən psixologiya üzrə fəlsəfə doktoru Ramidə Oktayqızı Ajans.az-a bildirib ki, dünyada yaşayan insanların çoxu ildə bir neçə dəfə davamlı olaraq depressiv vəziyyətə düşə bilərlər:

‘’Bunun müxtəlif səbəbləri mövcuddur. Bildiyiniz kimi, depressiya insanların tənhalığa qapanması, ruhdan düşməsi, xarici görkəminə fikir verməməsi, insanlara qarşı küskünlük kimi davranışlarla özünü göstərir. Hətta, depressiyaya meyilli insanlar, ümumiyyətlə, anadangəlmə psixoloji tipə malikdirlər. Onların həyatlarında ətrafındakı insanların tez-tez dəyişməsi, mühit dəyişmək imkanı isə daim görünür.
İkinci növ psixoloji depressiv hallarda isə insanlarda payız və yaz fəslində əhval-ruhiyyə dəyişiklikləri müşahidə olunur. Həddindən artıq depressiv hallar qadınlarda daha çox baş verdiyi üçün onlar yemə pozuntularından əziyyət çəkirlər. Əlavə olaraq, bəzi insanlar alış-veriş etməyə və daha çox pul xərcləməyə, bəziləri isə saçlarını kəsdirməyə meyl edirlər. Depressiv vəziyyətin müddəti 10 gündən 6 aya qədər və hətta 1-2 ilə qədər uzana bilər. Bu müddət, əsasən, insanın iradəsindən asılı olaraq dəyişir. Uzunmüddətli depressiya vəziyyətində mütləq dərman müalicəsi tələb olunur’’.